‘అవును..13 మర్డర్లు చేశాను..ఇంకా..’ అమెరికన్ సీరియల్ కిల్లర్ కథనం

అమెరికాలో 1970, 1980 ప్రాంతాల్లో అనేక నేరాలు, ఘోరాలకు పాల్పడ్డానని  అంగీకరించాడు ప్రస్తుతం 74 ఏళ్ళ వయసున్న సీరియల్ కిల్లర్. మాజీ పోలీసు అయిన ఇతని పేరు జోసెఫ్ జేమ్స్ డీయాంగెలో జూనియర్. ఆనాడు తననేరాలతో శాన్ ఫ్రాన్సిస్కో, కాలిఫోర్నియా తదితర నగరాలను హడలెత్తించాడు. తను 13 హత్యలు చేశానని, అత్యాచారాలకు, కిడ్నాపింగ్ లకు పాల్పడ్డానని కోర్టులో ఒప్పుకున్నాడు. లాస్ ఏంజిల్స్ లో ఇతడిని కోర్టు సోమవారం విచారించింది. జోసెఫ్ చేసిన కిరాతకాలకు గాను ఇతడిని ‘ గోల్డెన్ స్టేట్ కిల్లర్’ అని ఆ రోజుల్లో అభివర్ణించారట. సుమారు రెండు దశాబ్దాల పాటు ఇతడు  చేసిన ఘోరాలకు లెక్క లేదని, పోలీసుల కళ్ళు గప్పి చాకచక్యంగా పారిపోయేవాడని ప్రాసిక్యూటర్లు తెలిపారు. వారు అడిగిన ప్రశ్నలకు జోసెఫ్ ‘అవును’, ‘కాదు’, ఒప్పుకుంటున్నా’ అని ముక్తసరిగా సమాధానమిచ్చాడు.  ఇన్ని నేరాలు చేసిన ఇతని వయసు రీత్యా ఇతనికి మరణశిక్ష పడదని,  పెరోల్ లేకుండా యావజ్జీవ శిక్ష పడుతుందని కోర్టు వర్గాలు తెలిపాయి. వియత్నాం కు చెందిన ఈ సీరియల్ కిల్లర్.. తన నేరాలకు ఇప్పటికీ ఎలాంటి పశ్చాత్తాపాన్నీ ప్రకటించలేదు. 2018 లో ఇతడిని పోలీసులు అరెస్టు చేశారు. ఇతడ్ని కోర్టులో ఏ నాడో విచారించవలసి ఉండగా కరోనా వైరస్ కారణంగా జాప్యం జరిగిందని కోర్టు వర్గాలు పేర్కొన్నాయి. జోసెఫ్ సుమారు 50 రేప్ లకు పాల్పడ్డాడని, 1975 నుంచి ప్రారంభమైన ఇతడి కిరాతకాలు 1986 వరకు కొనసాగాయని ప్రాసిక్యూటర్లు వెల్లడించారు. 86 లో పద్దెనిమిదేళ్ల యువతిపై హత్యాచారం చేయడంతో పోలీసులకు పట్టుబడ్డాడు.