బంగారంపై రుణం తీసుకునే వారికి ఊరట.. కేంద్రం కీలక నిర్ణయం

ఈ ఏడాది ఏప్రిల్ 9న ఆర్‌బీఐ.. ఈ రుణాలపై కొన్ని ముసాయిదా మార్గదర్శకాలను జారీ చేసింది. తనఖా పెట్టుకొని ఇచ్చే రుణ విలువ, ఆ పసిడి విలువలో 75 శాతం కంటే అధికంగా ఉండరాదని పేర్కొంది. 

అంటే, రూ. లక్ష విలువైన బంగారానికి రూ. 75 వేల కంటే ఎక్కువ రుణం ఇవ్వకూడదని ఆర్‌బీఐ సూచించింది. ఈ నిబంధన వల్ల చిన్న, సన్నకారు రైతులకు రుణాలు లభించడం కష్టమవుతుంది.

ఈ నిర్ణయం తమిళనాడులోని రాజకీయ పార్టీలు, రైతు సంఘాల నుంచి తీవ్ర వ్యతిరేకత వ్యక్తమైంది. సీఎం స్టాలిన్.. స్వయంగా కేంద్ర ఆర్థిక మంత్రికి లేఖ రాసి, ఈ విషయంలో జోక్యం చేసుకోవాలని కోరారు. 

దీంతో చిన్న బంగారు రుణగ్రహీతల అవసరాలపై ప్రభావం పడకుండా కొత్త మార్గదర్శకాలు ఉండాలని,  దీనిలో భాగంగానే రూ.2 లక్షల వరకు రుణాలు తీసుకొనేవారికి వాటి నుంచి మినహాయించాలని సూచించారు.

కొత్త మార్గదర్శకాలు క్షేత్రస్థాయిలో అమలుచేసేందుకు సమయం పడుతుంది కాబట్టి 2026 జనవరి 1 నుంచి కొత్త నిబంధనలు అమలుచేయాలని ఆర్‌బీఐకి ఆర్థికశాఖ సూచించింది.