రైల్వేశాఖ దేశవ్యాప్తంగా ప్రధాన నగరాలలో మధ్య వందేభారత్‌ రైళ్లను నడిపేందుకు సన్నాహాలు చేస్తున్న సంగతి తెలిసిందే.
ఇప్పటికే పలు నగరాల మధ్య వందేభారత్‌ రైళ్లు నడుస్తున్నాయి. ఇందులో భాగంగా విశాఖ-సికింద్రాబాద్‌ మధ్య వందేభారత్‌ తిరుగుతుంది.
ఇప్పుడు మరో వందేభారత్‌ ఏపీలో చెక్కర్లు కొట్టనుంది. విశాఖ-తిరుపతి మధ్య వందేభారత్‌ ఎక్స్‌ప్రెస్‌ రైలును నడపడానికి రైల్వేశాఖ ప్లాన్ చేస్తోందని తెలుస్తోంది.
ఈ మేరకు ఆదివారం సాయంత్రం 16 బోగీలతో కూడిన వందేభారత్‌ రైలు చెన్నై నుంచి విశాఖకు బయలుదేరిందని సమాచారం.
అయితే ఈ రైలు గురించి ఇప్పటివరకు తమకు ఎటువంటి సమాచారం అందలేదని అంటున్నారు వాల్తేరు రైల్వే అధికారులు.
విశాఖ-సికింద్రాబాద్‌ మధ్య వందేభారత్‌ రైలు నడుస్తున్నప్పటికీ ఏదైనా సాంకేతిక సమస్య తలెత్తితే ఈ రైలును రద్దు చేయాల్సి వస్తోంది.
తరచూ ఇలా జరుగుతుండటంతో ప్రయాణికులు అసహనం వ్యక్తం చేస్తున్నారు. ఈ సమస్య పరిష్కారానికి మరో రేక్‌ను చెన్నై నుంచి రప్పిస్తున్నట్లు పేర్కొంటున్నారు.
మరో పక్క దీన్ని విశాఖ-తిరుపతి మధ్య నడుపుతారనే ప్రచారం సాగుతోంది. దీనిపై పూర్తి స్థాయిలో స్పష్టత రావాల్సి ఉంది.