ఆంధ్రప్రదేశ్ రాష్ట్రంలోని రేషన్ కార్డుదారులందరికీ ముఖ్యమంత్రి చంద్రబాబు నాయుడు ఒక శుభవార్త ప్రకటించారు. దీపావళి పండుగ సందర్భంగా ప్రజలకు ఆర్థిక భారం తగ్గించేందుకు కీలక నిర్ణయాలు తీసుకున్నారు. నిత్యావసర సరుకుల ధరలు విపరీతంగా పెరిగిన నేపథ్యంలో, సామాన్యులు వాటిని కొనుగోలు చేయడానికి పడుతున్న ఇబ్బందులను దృష్టిలో ఉంచుకొని, రేషన్ షాపుల ద్వారా సబ్సిడీపై కొన్ని ముఖ్యమైన సరుకులను పంపిణీ చేయాలని అధికారులను ఆదేశించారు. రాబోయే దీపావళి నుంచే ఈ పథకం అమలులోకి వస్తుంది. ఈ పథకం కింద కిలో కందిపప్పును రూ.100కి, లీటర్ పామాయిల్ను రూ.110కి, కిలో గోధుమపిండిని రూ.25కి రేషన్ కార్డుదారులకు అందించనున్నారు. ఇది సామాన్య ప్రజలపై నిత్యావసర సరుకుల ధరల భారాన్ని గణనీయంగా తగ్గిస్తుందని ప్రభుత్వం భావిస్తోంది. అంతేకాకుండా, ధరణి బ్రాండ్ బియ్యం పంపిణీని కూడా విస్తరించాలని సీఎం సూచించారు. ప్రస్తుతం రైతు బజార్లలో విక్రయిస్తున్న ధరణి బ్రాండ్ బియ్యాన్ని ఇకపై మున్సిపాలిటీలు, మండల కేంద్రాల్లో మొబైల్ వెహికల్స్ ద్వారా ప్రజల వద్దకే తీసుకువస్తారు. కిలో ధరణి బియ్యం ధర రూ.49 నుండి రూ.50గా నిర్ణయించారు. ఈ చర్యల ద్వారా సామాన్యులకు మరింత అందుబాటులోకి నిత్యావసర సరుకులను తీసుకురావాలనేది ప్రభుత్వ ఉద్దేశ్యం.