ఉపాధి కల్పనే లక్ష్యంగా…ఐటీ, పారిశ్రామిక విధానంలో మార్పులు..

ఏపీ సీఎం జగన్ మోహన్ రెడ్డి పరిపాలనలో దూసుకుపోతున్నారు. ఓ వైపు విజృంభిస్తున్న కరోనాను కట్టడి చేస్తూనే…పలు అభివృద్ధి కార్యక్రమాలకు శ్రీకారం చుడుతున్నారు. కొత్త పారిశ్రామిక విధానం, ఐటీ రంగంపై సీఎం జగన్ కీలక నిర్ణయం తీసుకున్నారు. గురువారం (జూలై 2)రోజున ఆయన తన క్యాంపు కార్యాలయంలో 2020 – 23 పారిశ్రామిక విధానంపై ఉన్నత స్థాయి సమీక్ష నిర్వహించారు. ఉద్యోగ కల్పన, ప్రాంతాల మధ్య సమత్యులత, పర్యావరణ సానుకూల అభివృద్ధి కేంద్రంగా నూతన పారిశ్రామిక విధానాన్ని రూపొందించేందుకు కార్యాచరణ సిద్ధం చేస్తున్నట్లు వివరించారు. అందులో భాగంగా.. స్థానికంగా ఎక్కువ మందికి ఉద్యోగాలు కల్పించే సూక్ష్మ, చిన్న పరిశ్రమలను మరింత ప్రోత్సహించాలని చెప్పారు. వాటికి పునరుద్ధరణ, చేయూత ఇవ్వడంపై ప్రత్యేక శ్రద్ధ వహించాలన్నారు.

రాష్ట్రంలో స్కిల్‌ డెవలప్‌మెంట్‌ సెంటర్ల మీద ప్రత్యేక దృష్టి పెట్టాలని ఈ సందర్బంగా సీఎం జగన్ సూచించారు. ఇందులో భాగంగా విశాఖపట్నంలో ఉన్నత శ్రేణి నైపుణ్య వర్సిటీ ఏర్పాటు చేయనున్నట్టు సీఎం జగన్ ప్రకటించారు. ఈ నిర్ణయం వల్ల ఐటీ రంగం గొప్ప మలుపు తిరుగుతుందని, అన్ని యూనివర్సిటీల్లోనూ ఎక్స్‌టెన్షన్ విధానాలపై దృష్టి సారించాలని పేర్కొన్నారు. ఈ యూని వర్సిటీలో ప్రవేశపెట్టాల్సిన కోర్సులు, బోధన అంశాలపై ప్రఖ్యాత ఐటీ నిపుణుల సలహాలు తీసుకోవాలని అధికారులకు సూచించారు. విదేశీ పెట్టుబడులు సాధించడంపైనా దృష్టి సారిస్తున్నామని, ఎంఎస్ఎంఈల పునరుద్ధరణ, చేయూతపైనా ప్రత్యేక శ్రద్ధ వహించాలని జగన్ ఆదేశించారు.

ఓ వైపు పారిశ్రామిక అభివృద్ధికి కృషి చేస్తూనే…మరోవైపు పరిశ్రమల వల్ల కలిగే అనర్థాలపైనా ప్రత్యేక దృష్టి పెట్టాలని సీఎం చెప్పారు. పరిశ్రమల నుండి వెలువడే వ్యర్థాలు, కాలుష్యంపై అప్రమత్తంగా ఉండాలని ఆదేశించారు. పరిశ్రమలకు ప్రోత్సాహం ఎంత ముఖ్యమో వాటి వల్ల ప్రజలకు ఎటువంటి ఇబ్బందులు కలుగకుండా చూడాల్సిన అవశ్యకత కూడా అంతే ముఖ్యమన్నారు. పారిశ్రమలు తప్పని సరిగా కాలుష్య నివారణ చర్యలు పాటించేలా చూడాల్సిన బాధ్యత అధికారులేనని స్పష్టం చేశారు.