టిడిపిలో మరో వికెట్ ఫట్.. గంటా బాటలోనే యామిని ?

ఏపీ నేతలు పొలిటికల్ మైగ్రేషన్‌లో పోటీ పడుతున్నారు. ముఖ్యంగా టిడిపి గూటి నుంచి బయట పడేందుకు తెలుగు తమ్ముళ్ళు పోటీ పడుతుంటే మేమేమీ తీసిపోలేదని తెలుగు చెల్లెమ్మలు దూకుడు ప్రదర్శిస్తున్నారు. టిడిపి గూటి నుంచి బయటికొచ్చే వారు అయితే బిజెపిలోనే.. లేకపోతే వైసీపీలోనో చేరేందుకు రంగం సిద్దం చేసుకుంటున్నారు.

తాజాగా టిడిపి అధికార ప్రతినిధిగా మొన్నటి ఎన్నికల దాకా ప్రసార మాధ్యమాలలో అదర గొట్టిన సాధినేని యామిని తెలుగుదేశం పార్టీకి, రాష్ట్ర అధికార ప్రతినిధి పోస్టుకు రాజీనామా చేశారు. గురువారం మధ్యాహ్నం తాను స్వదస్తూరితో రాసిన లేఖను టిడిపి అధినేత చంద్రబాబు నాయుడుకు పంపించారు. వ్యక్తిగత కారణాలతోపాటు దేశ, రాష్ట్ర రాజకీయాలలో జరుగుతున్న పరిణామాల నేపథ్యంలోనే రాజీనామా నిర్ణయాన్ని తీసుకున్నట్లు యామిని ప్రకటించారు. ప్రస్తుతానికి భవిష్యత్ కార్యాచరణపై ఇంకా ఏమీ అనుకోలేదని, త్వరలోనే ఒక నిర్ణయం తీసుకుంటానని ఆమె చంద్రబాబుకు రాసిన లేఖలో పేర్కొన్నారు.

అయితే.. సాధినేని యామిని శర్మ త్వరలో బిజెపిలో చేరతారని పెద్దఎత్తున ప్రచారం జరుగుతోంది. ఆల్‌రెడీ బిజెపి రాష్ట్ర నాయకత్వంతో సంప్రదింపులు జరిపినట్లు తెలుస్తోంది. బిజెపి ఏపీ అధ్యక్షుడు కన్నా లక్ష్మీనారాయణతో మాట్లాడి తన ఆసక్తులను వివరించగా.. ఆయన అంగీకరించడంతో టిడిపికి రాజీనామా చేసారని, రెండు, మూడు రోజుల్లో అంటే నవంబర్ 10న బిజెపి జాతీయ వర్కింగ్ ప్రెసిడెంట్ జె.పి. నడ్డా సమక్షంలో యామిని బిజెపిలో  చేరతారని అంటున్నారు. రెండురోజుల్లో రానున్న నడ్డా.. పర్యటన అత్యంత కీలకం కాబోతున్నట్లు సమాచారం. మాజీ మంత్రి గంటా శ్రీనివాస్ రావు చేరిక అంశం కూడా నడ్డా పర్యటనలో తేలిపోనుంది.

కాగా.. యామిని మొన్నటి ఎన్నికలకు ముందే టిడిపిలో పూర్తి నిరాశకు గురయ్యారని సమాచారం. గుంటూరు నగరంలో తన సామాజిక వర్గం ఓట్లు అధికంగా వుండడంతో అక్కడ్నించి అసెంబ్లీకి పోటీచేయాలని చంద్రబాబు నాయుడుని యామిని సంప్రదించగా.. ఆయన పెద్దగా ఆసక్తి చూపకపోవడంతో కినుక వహించారు యామిని. అయితే.. చంద్రబాబు స్వయంగా బుజ్జగించడంతో అప్పట్లో పార్టీకి దూరమవ్వాలనే ఆలోచనను అప్పట్లో పక్కన పెట్టారు. అయితే.. సోషల్ మీడియాలో యామిని మీద విపరీత స్థాయిలో ట్రోలింగ్ జరగడంతో ఆమె తీవ్ర మనస్తాపానికి గురయ్యారు. ఏపీ డిజిపిని కలిసి చర్యలు తీసుకోవాలని విఙ్ఞప్తి చేశారు.

తాజాగా టిడిపి పరిస్థితి రోజురోజుకూ వీక్ అవుతున్న తరుణంలో తాను కూడా బెటర్ ఆల్టర్నేటివ్ చూసుకోవడం మంచిదన్న ఉద్దేశంతో బిజెపి నేతలను సంప్రదించినట్లు తెలుస్తోంది. బిజెపి రాష్ట్ర అధికార ప్రతినిధి పోస్టుతోపాటు.. వచ్చే ఎన్నికల్లో టిక్కెట్ కన్‌ఫర్మ్  చేయడంతో బిజెపిలో  చేరేందుకు యామిని శర్మ సిద్దమైనట్లు తెలుస్తోంది.