Omicron Variant: కొత్త వేరియంట్‌పై కీలక పరిశోధనలు.. ఒమిక్రాన్‌ తరహా మరో వైరస్‌ గుర్తింపు

Omicron Variant: గత ఏడాదికిపైగా కరోనా వైరస్‌ తీవ్ర స్థాయిలో విజృంభించి ప్రస్తుతం తగ్గుముఖం పడుతున్న నేపథ్యంలో మరో కొత్త వైరస్‌ వచ్చి ఆందోళనకు గురి చేస్తోంది. సౌతాఫ్రికాలో పుట్టిన ఒమిక్రాన్‌ వేరియంట్‌పై సర్వత్రా ఆందోళన నెలకొంది. చాపకింద నీరులా అన్ని దేశాలకు వ్యాపిస్తోంది ఈ వేరియంట్‌. ఇక దక్షిణాఫ్రికాలో వెలుగు చూసిన కొత్త వేరియంట్‌ ఒమిక్రాన్‌పై ప్రపంచ దేశాలు ఆందోళన చెందుతున్నాయి. అయితే వ్యాధి తీవ్రతపై ఇప్పటి వరకు స్పష్టత లేనప్పటికీ వైరస్‌ వ్యాప్తి అధికంగా ఉన్నట్లు తెలియడంతో దేశాలన్ని ఆందోళనకు గురవుతున్నాయి. ప్రపంచ ఆరోగ్య సంస్థ (డబ్ల్యూహెచ్‌వో) దీనిని ఆందోళనకర వేరియంట్‌గా (VoC) ప్రకటించింది. ఇదే సమయంలో ఒమిక్రాన్‌ వేరియంట్‌ జన్యువులో మరిన్ని మార్పులకు గురైనట్లు తాజాగా ఆస్ట్రేలియా పరిశోధకులు గుర్తించారు. వైరస్‌ నిర్ధారణ పరీక్షల్లో గుర్తించలేని ఒమిక్రాన్‌ తరహా రకాన్ని కనుగొన్నామని క్వీన్స్‌లాండ్‌ ఆరోగ్యశాఖ అధికారులు వెల్లడించారు. అయితే ఇది ఒమిక్రాన్‌లో కొత్త వేరియంట్‌ మాత్రం కాదని వారు స్పష్టం చేశారు.

గత నాలుగు రోజుల కిందట దక్షిణాఫ్రికా నుంచి క్వీన్స్‌లాండ్‌కు వచ్చిన ప్రయాణికులకు పరీక్షలు నిర్వహించారు. వారిలో ఇద్దరికి కరోనా పాజిటివ్‌ నిర్ధారణ అయ్యింది. అయితే ఆ ఫలితాలకు జీనోమ్‌ సీక్వెన్సింగ్‌ చేపట్టగా ఒక దానిలో వాస్తవ వేరియంట్‌తో పోలిస్తే అందులోని జన్యువులో మార్పిడి కలిగి ఉన్నట్లు గుర్తించారు. అలాగే సాధారణ పరీక్షల్లోనూ దీని గుర్తించే వీలు కలుగడం లేదని క్వీన్స్‌లాండ్‌ ఆరోగ్యశాఖ అధికారులు తెలిపారు. అయితే కొత్తగా వచ్చి ఆందోళన కలిగిస్తున్న ఒమిక్రాన్‌ వేరియంట్‌కు సంబంధించి పూర్తి సమాచారం రాకముందే ఈ వేరియంట్‌ తరహా మరో కొత్త వైరస్‌ గుర్తించడం పరిశోధకులకు మరో సవాల్‌గా మారిందనే చెప్పాలి. ఇప్పటికే నిర్ధారించిన ఒమిక్రాన్‌తో పోలిస్తే తాజాగా గుర్తించిన ఒమిక్రాన్‌ తరహా వేరియంట్‌లో 14 మ్యుటేషన్లు జరిగినట్లు క్వీన్స్‌లాండ్‌ పరిశోధకులు అనుమానం వ్యక్తం చేస్తున్నారు.

ఇవి కూడా చదవండి:

Omicron: కొన్ని రోజుల్లోనే 57 దేశాలకు వ్యాపించిన ఒమిక్రాన్… యూరోప్ దేశాల్లో డేంజర్ బెల్స్ మోగిస్తుందని హెచ్చరిక..

Omicron Restrictions: ఒమిక్రాన్ దెబ్బ.. ఆంక్షల బాట పట్టిన అగ్ర రాజ్యాలు.. ఇకపై అలా అయితేనే ఎంట్రీ…