ఫ్యాన్సీ నంబర్ కోసం రూ.60కోట్లు.. కారు ధరకు ఇది ఎన్ని రెట్లంటే..!

ఫ్యాన్సీ నంబర్లు అంటే కొంతమందికి మక్కువ ఎక్కువే ఉంటుంది. స్టేటస్‌ను చూపించుకోవడం కోసం కావచ్చు.. లక్కీ నంబర్ కావచ్చు.. మరో కారణం కావచ్చు.. కోట్లు పెట్టి మరీ ఫ్యాన్సీ నంబర్లను తీసుకుంటుంటారు కొందరు. అదే కోవలో తనకు ఇష్టమైన లక్కీ నెంబర్ కోసం ఏకంగా రూ.60కోట్లు పెట్టి దాన్ని సొంతం చేసుకున్నాడు భారత్‌కు చెందిన బల్విందర్ సింగ్ సాహ్నీ అనే వ్యక్తి. ఇది అతడి కారు రేటు కంటే ఆరు రెట్లు ఎక్కువ అవ్వడం విశేషం.

వివరాల్లోకి వెళ్తే.. దుబాయి రోడ్ అండ్ ట్రాన్స్‌పోర్ట్ అథారిటీ ఇటీవల డీ5 అనే ఫ్యాన్సీ నంబర్‌ కోసం వేలం వేసింది. ఈ వేలంలో అక్కడే స్థిరపడ్డ భారతీయ వ్యాపారవేత్త బల్విందర్ రూ.60కోట్ల భారీ మొత్తాన్ని కోట్ చేశాడు. ప్రపంచంలోనే ఇది అత్యధిక రికార్డు కావడం విశేషం. దీనిపై బల్విందర్ మాట్లాడుతూ.. డీ5 తన లక్కీ నంబర్ అని.. దాన్ని రోల్స్ రాయిస్ ఫాంటమ్‌కి వాడబోతున్నానని తెలిపాడు. అయితే 90వ దశకంలో అరబ్ దేశాల్లోకి వెళ్లి వ్యాపారం మొదలుపెట్టారు బల్విందర్. ఆయన ఆర్ఎస్‌జీ ఇంటర్నేషనల్ అనే సంస్థకు అధిపతి. కార్లంటే ఆయనకు అమితమైన ఇష్టం కాగా.. బల్విందర్ గ్యారేజీలో వందకుపైగా కార్లున్నాయి. ఇక గతంలోనూ ఓ ఫ్యాన్సీ నంబర్ కోసం రూ.45కోట్లు చెల్లించి, అప్పట్లో హాట్‌ టాపిక్‌గా మారారు బల్విందర్.