‘సాహో’తో ‘సైరా’ పోలికా? డీలాపడుతున్న కలెక్షన్స్!

దాదాపు 10 ఏళ్ళ తర్వాత ‘ఖైదీ నెంబర్ 150’ సినిమాతో రీ-ఎంట్రీ ఇచ్చిన బాస్ మెగాస్టార్ చిరంజీవి తానే బాక్స్ ఆఫీస్ బాద్షా అని మరోసారి నిరూపించుకున్నాడు. ఇక చిరు ‘సైరా’ సినిమాతో పెద్ద సాహసం చేశారని చెప్పవచ్చు. మొదటిసారి తన కెరీర్‌లో చారిత్రాత్మక చిత్రంలో నటిస్తున్నాడు. తొలి స్వాతంత్ర్య సమరయోధుడు ఉయ్యాలవాడ నరసింహారెడ్డి జీవితకథ ఆధారంగా తెరకెక్కిన ఈ భారీ బడ్జెట్ సినిమా మొదట్లో అన్ని భాషల్లోనూ అద్భుతమైన కలెక్షన్స్ దిశగా దూసుపోతున్నట్లు వార్తలు వచ్చినప్పటికీ.. విడుదలైన మూడో రోజు నుంచే వసూళ్లు తగ్గుతున్నట్లు తెలుస్తోంది. నిడివి మరీ ఎక్కువగా ఉండటం.. డైలాగులు సగటు ప్రేక్షకుడికి అర్ధంకాని రీతిలో సాగతీతగా ఉండటం.. లాజిక్ లేని ఫైట్లు.. మెల్లగా మెగాస్టార్ లెవెల్ ని కుదిస్తున్నాయి.

తెలుగు ప్రేక్షకుల్లో మెగాస్టార్‌కు తిరుగులేదు. కానీ ఈ సినిమా తెలుగులో తెరకెక్కింది కాబట్టి ఇతర బాషా ప్రేక్షకులు పెదవి విరుస్తున్నారన్నది టాక్. ‘సైరా’ ప్రీ రిలీజ్ బిజినెస్ అదిరిపోయినప్పటికీ.. కలెక్షన్స్ విషయంలో మాత్రం డీలా పడిందని చెప్పొచ్చు. తెలుగుతో పాటు తమిళ, హిందీ, మలయాళం, కన్నడ భాషల్లో విడుదలైన ఈ సినిమాకు ఆయా ఇండస్ట్రీల్లో గట్టి పోటీనే ఎదురైంది. అక్టోబర్ 2న హిందీలో ‘వార్’ విడుదల కాగా.. హాలీవుడ్‌లో ‘జోకర్’ రిలీజయ్యింది. ఇక నిన్న తమిళంలో ‘అసురన్’ విడుదలైంది. పలు సినిమాలు బాక్స్ ఆఫీస్‌పై దండయాత్ర చేయడంతో ‘సైరా’ కలెక్షన్స్‌పై ప్రభావం పడింది.

ఇక మూడు రోజులకు గానూ సైరా రూ.81.4 కోట్లు కలెక్ట్ చేసిందని టాక్. అటు ఈ సినిమా ‘బాహుబలి 2’, ‘సాహో’ మార్క్‌ను కూడా దాటలేకపోయింది. ఈ లిస్ట్‌లో ‘బాహుబలి 2’ రూ.214 కోట్లుతో మొదట స్థానంలో ఉండగా.. ‘సాహో’ రూ.125.7 కోట్లుతో.. ‘2పాయింట్ o’ రూ.93.3 కోట్లుతో.. ‘కబాలి’రూ.87.5 కోట్లుతో ఆ తర్వాత స్థానాల్లో ఉన్నాయి. ఈ వరుసలో ‘సైరా’ ఐదో స్థానంలో నిలిచింది.

‘సైరా’కు కలెక్షన్స్ పరంగా దెబ్బపడడానికి చాలా కారణాలే ఉన్నాయి. ‘సాహో’ తరహాలో ఈ సినిమాకు కూడా దేశవ్యాప్తంగా ప్రమోషన్స్ చేశారు కానీ.. వీటి వల్ల మాత్రమే కాసులు రాలతాయని అనుకోవడం ఎంత మాత్రం సమంజసం కాదు. అదీ కూడా చిరంజీవికి తెలుగులో ఉన్నంత క్రేజ్.. మిగతా భాషల్లో లేదు. పైగా ఆయన వయసు కూడా మైనస్‌గా మారింది. ఇకపోతే ఈ సినిమా అన్ని ఇండస్ట్రీల నుంచి భారీ తారాగణం నటించారు. అయితే అవన్నీ కూడా కథలో సుదీర్ఘంగా ఉండిపోయే పాత్రలు కాకపోవడంతో వాళ్ళు ఫ్యాన్స్‌కు సరిగ్గా కనెక్ట్ కాలేరు. ఒకరిద్దరు మినహా అందరూ కూడా తక్కువ నిడివి కలిగిన పాత్రలే చేశారు. ఇకపోతే చిరంజీవి దేశవ్యాప్తంగా గుర్తింపు పొందినా.. ఆయన సినిమాలను నార్త్ ప్రేక్షకులు ఎగబడి చూసేలా ఆసక్తి చూపరు. ‘బాహుబలి’ తరహాలో హిందీ వాళ్ళను ఆకట్టుకోవడానికి ఇది ఫాంటసీ సినిమా కూడా కాదు. అంతేకాక ఇప్పటికే బీ-టౌన్‌లో దేశభక్తి ప్రేరేపించే సినిమాలు ఎన్నో వచ్చాయి.