వాట్సాప్ న్యూ ఫీచర్… ఇకపై గ్రూపుల బెడద లేనట్లే.?

సోషల్ మీడియా మెసేజింగ్ యాప్ వాట్సాప్ తన యూజర్లకు మరో గుడ్ న్యూస్ అందించింది. వరుసగా కొత్త ఫీచర్లను వినియోగదారులకు అందుబాటులోకి తీసుకువస్తూ.. తమ బ్రాండ్‌ను పెంచుకుంటూపోతోంది. ఇటీవలే ఆండ్రాయిడ్ యూజర్లకు ఫింగర్ ప్రింట్ అన్‌లాక్ ఫీచర్‌ను విడుదల చేసిన వాట్సాప్.. ఇప్పుడు గ్రూప్ ప్రైవసీ సెట్టింగ్స్‌లో కొన్ని మార్పులు చేసి ప్రపంచవ్యాప్తంగా ఉన్న వినియోగదారులందరికీ అందుబాటులోకి తీసుకురానుంది. ఈ ఫీచర్‌తో మీకు గ్రూప్‌ల బాధ ఉండదు. ఇకపై ఎవరైనా మిమ్మల్ని గ్రూప్‌లో చేర్చుకోవాలని చూస్తే.. వారికి మీ పర్మిషన్ తప్పనిసరిగా ఉండాలి.

గతంలో ఇన్విటేషన్ అనే ఫీచర్‌ను తీసుకొచ్చిన వాట్సాప్.. ఇప్పుడు ఆ స్థానంలో గ్రూప్ ప్రైవసీ సెట్టింగ్స్‌లోనే పలు మార్పులు చేసింది. ఇన్విటేషన్ ఫీచర్ వల్ల ఎవరైనా మిమ్మల్ని గ్రూప్‌లో యాడ్ చేయాలని చూస్తే వారికి మీ అనుమతి తప్పనిసరి. గ్రూప్‌లో యాడ్ చేయాలంటే మిమ్మల్ని మొదటగా ఆహ్వానిస్తారు. మీరు ఓకే అన్నాక గ్రూప్‌లో యాడ్ అవ్వచ్చు. ఇక ఇప్పుడు కొత్తగా వచ్చిన సెట్టింగ్స్ వల్ల మీరూ.. ఏఏ గ్రూప్స్‌లో చేరాలనుకుంటున్నారో నిర్ణయం తీసుకోవచ్చు.

సెట్టింగ్స్ మార్చడానికి మొదటగా వాట్సాప్ ప్రైవసీ సెట్టింగ్స్ ఓపెన్ చేయండి.. ఆ తర్వాత అకౌంట్ ఓపెన్ చేసి.. అందులో ప్రైవసీ బటన్ క్లిక్ చేయండి. ప్రైవసీలో గ్రూప్స్ క్లిక్ చేస్తే మీకు.. Everyone, My contacts, My contacts except, Nobody అని నాలుగు ఆప్షన్స్ కనిపిస్తాయి. ఆ ఆప్షన్స్ బట్టి మీరు నచ్చిన విధంగా గ్రూప్స్‌లో యాడ్ కావచ్చు. దీని వల్ల యూజర్లకు ఎంతగానో ఉపయోగం ఉండటమే కాకుండా గ్రూప్స్ తలనొప్పి తగ్గుతుంది. కాగా, ప్రస్తుతం ఈ ఫీచర్ బీటా యూజర్లకు మాత్రమే అందుబాటులో ఉండగా.. త్వరలోనే మిగతా యూజర్లకు అందుబాటులోకి రానుంది.