‘కేజీఎఫ్‌’ చిత్రలతో దేశవ్యాప్తంగా గుర్తింపు తెచ్చుకున్నారు కన్నడ హీరో యశ్‌.
ప్రశాంత్‌ నీల్‌ దర్శకత్వం వహించిన ఈ రెండు చిత్రాలని హోంబలే ఫిల్మ్స్‌ సంస్థ నిర్మించింది.
శుక్రవారంతో ఈ సిరీస్‌లో వచ్చిన ‘కేజీఎఫ్‌2’ విడుదలై ఏడాది పూర్తయిన సందర్భంగా చిత్ర నిర్మాణ సంస్థ ‘కేజీఎఫ్‌3’పై స్పష్టత ఇస్తూ ఓ ప్రత్యేక వీడియో షేర్ చేసింది.
‘‘రాఖీ భాయ్‌ 1978 నుంచి 1981 వరకు ఎక్కడ ఉన్నారు?’’ అంటూ విడుదలైన ఆ వీడియో సోషల్ మీడియాలో వైరల్‌గా మారింది.
దీన్ని బట్టి ఈ చిత్ర పార్ట్ 3లో రాఖీ భాయ్‌ కనిపించకుండా పోయిన ఆ నాలుగేళ్లలో ఎక్కడున్నాడు? ఏం చేశాడు? అన్నది చూపించనున్నట్లు తెలుస్తోంది.
అయితే ఈ చిత్రం ఎప్పుడు పట్టాలెక్కుతుందన్నది స్పష్టత ఇవ్వలేదు.
ప్రస్తుతం ప్రశాంత్‌ నీల్‌ ప్రభాస్‌తో ‘సలార్‌’ చిత్రం చేస్తూ బిజీగా ఉన్నారు.
దీని తర్వాత ఎన్టీఆర్‌తో ఓ చిత్రం చేయనున్న సంగతి తెలిసిందే.
మరి ‘కేజీఎఫ్‌3’ని ఎన్టీఆర్‌ చిత్రం పూర్తయ్యాక పట్టాలెక్కిస్తారా? లేదా అంతకంటే ముందుగానే మొదలుపెడతారా? అన్నది తేలాల్సి ఉంది.