1 అక్టోబర్‌ 2023
ఆగస్టులో యూనిఫైడ్‌ పేమెంట్స్‌ ఇంటర్‌ఫేస్‌ (యూపీఐ) ద్వారా జరిగిన డిజిటల్‌ చెల్లింపుల సంఖ్య గతంతో పోల్చితే ఎన్నో రెట్లు పెరిగి వెయ్యి కోట్లను అధిగమించింది.
ప్రధానంగా పర్సన్‌-టు-మర్చంట్‌ (పీ2ఎం) లావాదేవీల్లో పెరుగుదలే కారణమని ఓ నివేదిక పేర్కొన్నది.
2018 జనవరిలో యూపీఐ లావాదేవీల సంఖ్య 151 మిలియన్లుగా ఉంది.ఈ ఏడాది జూన్‌లో 9.3 బిలియన్లుగా నమోదైంది.
గత ఏడాది జనవరిలో జరిగిన మొత్తం యూపీఐ లావాదేవీల్లో పీ2ఎం లావాదేవీల వాటా 40.3 శాతంగా ఉంటే, ఈ జూన్‌లో 57.5 శాతానికి పెరిగినట్టు వరల్డ్‌లైన్‌ తెలిపింది.
యూపీఐ ద్వారా జరుగుతున్న పీ2ఎం లావాదేవీల్లో సగటు లావాదేవీ విలువ తగ్గింది. గత ఏడాది జనవరిలో ఒక్కో లావాదేవీ సగటున రూ.885గా ఉన్నట్టు తేలింది.
ఈ జూన్‌లో రూ.653గానే ఉంది. దీంతో యూపీఐ ఆధారంగా వ్యాపారులకు వ్యక్తులు ఎక్కువగా చిన్నచిన్న లావాదేవీలనే జరుపుతున్నారని రుజువైందంటూ వరల్డ్‌లైన్‌ తెలిపింది.
ఇక ఎలక్ట్రానిక్‌ టోల్‌ కలెక్షన్‌ (ఈటీసీ)కు సంబంధించి కూడా లావాదేవీలు పెరిగినట్టు నివేదికలో స్పష్టమైంది.
గత ఏడాది జనవరితో చూస్తే ఈ ఏడాది జూన్‌లో లావాదేవీలు 56.5 శాతం ఎగిసి 45.97 మిలియన్ల నుంచి 71.92 మిలియన్లకు చేరుకున్నాయి.