హీరోయిన్‌గా కెరీర్‌ మొదలు పెట్టి ఆతర్వాత స్పెషల్‌ సాంగ్స్‌తో తెలుగు తెరపై తనకంటూ ఓ ప్రత్యేక గుర్తింపు తెచ్చుకుంది హంసానందిని.
సినిమాలు, స్పెషల్‌ సాంగులతో బిజీగా ఉన్న ఈ అందాల తార 2021 డిసెంబర్‌లో ఒక షాకింగ్‌ న్యూస్‌ చెప్పింది. తాను క్యాన్సర్‌ బారిన పడినట్లు చెప్పి అందరినీ ఆశ్చర్యపరిచింది.
అప్పటికే కీమోథెరపీ చికిత్స చేయించుకుంటున్నట్లు చెప్పిన ఈ ముద్దుగుమ్మ తాజాగా ఒక శుభవార్త చెప్పింది. సుమారు ఏడాదిగా బ్రెస్ట్‌ క్యాన్సర్‌తో పోరాడుతున్న ఆమె
16 సైకిల్స్‌ కీమోథెరపీ తర్వాత విజయవంతంగా కోలుకున్నట్లు తెలిపింది. ప్రస్తుతం పూర్తి ఆరోగ్యంతో ఉన్నానన్న హంసా నందిని తిరిగి షూటింగ్‌లోనూ పాల్గొనడం విశేషం.
‘సినిమా సెట్లో ఉంటే ఆ అనుభూతే వేరు. ఇది నాకు మరో పునర్జన్మ లాంటిది. కెమెరా ముందు సజీవంగా ఉండే చోట నా పుట్టిన రోజు రావడం మంచి మార్గమని తెలుసు.
నా తోటి నటులు, సినిమా సిబ్బందితో బర్త్‌ డే వేడుకలు జరుపుకుంటాను. ఇలాంటి సందర్భాన్ని ఎలా మిస్‌ అవుతాను? అభిమానుల ప్రేమ, ఆప్యాయతల వల్లే నేను కోలుకుని రాగలిగాను.
అందరికీ కృతజ్ఞతలు. ఐ యామ్‌ బ్యాక్’ అని తన ఆనందాన్ని పంచుకుంది హంసానందిని. కాగా సుమారు 19 ఏళ్ల క్రితం హంసానందిని తల్లి కూడా క్యాన్సర్‌తో కన్నుమూసింది.