గోల్ఫ్ కోర్స్ మైదానంలో వాటి ‘టగ్ ఆఫ్ వార్ చూడాల్సిందే’!

సౌత్ కెరొలినా (అమెరికా) లోని హిల్టన్ హెడ్ లేక్స్ లో గల గోల్ఫ్ కోర్స్ మైదానంలోకి అప్పుడే చేరుకున్న గోల్ఫ్ ప్లేయర్లు తమ కళ్ళను తామే నమ్మలేకపోయారు. ఆ సీన్ చూసి ఆశ్చర్యంతో నోళ్లు వెళ్ళబెట్టారు. కారణం ? ఆ పచ్ఛటి, మెత్తని మైదానంలో రెండు భారీ మొసళ్ళు ఒకదానితో ఒకటి భీకరంగా తలపడుతున్నాయి. మల్లయుధ్ధంలో ఇద్దరు వస్తాదులు ఎవరికి వారు తమదే పై చేయి కావాలని ఎంత ప్రయత్నిస్తారో, ఎలా కలబడతారో అలాగే ఆ రెండూ భయానక పోరు సాగించాయి. కిందా, మీదా పడుతూ దాదాపు రెండు గంటల పాటు ఆ మొసళ్ళు ఫైట్ చేశాయని ,మ్యాథ్యూ ప్రాఫిట్ అనే ప్లేయర్ తన ఫేస్ బుక్ లో వాటి తాలూకు వీడియోను పోస్ట్ చేశాడు. ఆ దృశ్యాన్ని చూసి తన నరాలు ‘హీటెక్కిపోయాయని’ పేర్కొన్నాడు. ‘ఇట్ వాజ్ ప్రెట్టీ నెర్వ్ రాకింగ్ సీయింగ్ దట్’ అని రాసుకొచ్చాడు.  గోల్ఫ్ కోర్స్  గ్రౌండ్ లో మొసళ్ళు కంబడడం ఇదే మొదటిసారి కాదు. గత ఏడాది ఫ్లోరిడాలోని ఓ గోల్ఫ్ క్లబ్ మైదానంలో కూడా సుమారు పన్నెండు అడుగుల పొడవున్న మొసలి నింపాదిగా  వెళ్తున్న సీన్ ని చాలామంది తమ కెమెరాలకెక్కించారు.