అరుణ గ్రహంపై అన్వేషణ…జపాన్ నుంచి ఎగసిన యుఏఈ ఉపగ్రహం

అంగారక గ్రహంపై అన్వేషణకు గల్ఫ్ దేశాల కూటమి..యునైటెడ్ అరబ్ ఎమిరేట్స్ (యుఎఈ) కూడా శ్రీకారం చుట్టింది. ఈ కూటమి రూపొందించిన రాకెట్.. “హాప్” జపాన్ లోని టనెగాషిమా స్పేస్ సెంటర్ నుంచి నింగిలోకి ఎగసింది. స్థానిక కాలమానం ప్రకారం ఆదివారం ఉదయం 6 గంటల 58 నిముషాలకు దీన్ని ప్రయోగించారు. అరుణ గ్రహంపై వాతావరణాన్ని అధ్యయనం చేసేందుకు తామీ ప్రయోగాన్ని చేపట్టినట్టు  యూఏఈ వర్గాలు వెల్లడించాయి. అరబిక్ లో ఈ రాకెట్ లాంచ్ ని ‘అల్-అమల్’ అని వ్యవహరిస్తారట. గతంలోనే రెండు సార్లు ఈ మిషన్ ని చేపట్టదలచినప్పటికీ వాతావరణం బాగు లేనందున వాయిదా వేశారు. ఈ మిషన్ విజయవంతమైందని సంబంధిత వర్గాలు తెలిపాయి. ప్రయోగం జరిగిన గంట అనంతరం ఇది సక్సెస్ అయినట్టు జపాన్ లోని కంట్రోల్ రూమ్ లో ఉన్న శాస్త్రవేత్తలంతా  ప్రకటించి హర్షాతిరేకంతో చప్పట్లు కొట్టారు. దుబాయ్ లోనూ ఇదే ‘సంబర వాతావరణం’ కనిపించింది. ఇక్కడి ఎత్తయిన  బుర్జ్ ఖలీఫా కట్టడంపై పది సెకండ్లపాటు దేదీప్యమానంగా .. కళ్ళు మిరుమిట్లు గొలిపేలా లైట్ల కాంతులు విరజిమ్మాయి. వచ్ఛే ఏడాది ఫిబ్రవరి నాటికి ఈ ఉపగ్రహం మార్స్ కక్ష్యలోకి చేరవచ్ఛునని  భావిస్తున్నారు.  ఏడు ఎమిరేట్లతో కూడిన యుఎఈ ఏర్పడి ఆ నెలకు 50 సంవత్సరాలవుతుంది.