ట్యుటికోరన్ కస్టోడియల్ డెత్స్ కేసు సీబీఐకి.. తమిళనాడు సీఎం పళనిస్వామి

ట్యుటీకోరన్ కస్టోడియల్ మరణాల కేసును సీబీఐకి బదిలీ చేసేందుకు అనుమతించాలంటూ తాము మద్రాస్ హైకోర్టు మదురై బెంచ్ ని కోరుతామని తమిళనాడు సీఎం పళనిస్వామి ప్రకటించారు. ప్రస్తుతం ఈ కేసును మదురై బెంచ్ విచారిస్తోంది. ట్యుటికోరన్ లో తండ్రీ కొడుకులైన జయరాజ్, ఫెనిక్స్ పోలీసుల కస్టడీలో మరణించిన విషయం విదితమే. ఈ నెల 30 న ఈ కేసులో మదురై బెంచ్ విచారణ జరుపుతుందని, ఆ సందర్భంగా తాము ఈ మేరకు కోర్టును కోరుతామని పళనిస్వామి చెప్పారు. న్యాయస్థానంలో అప్పీలు దాఖలు చేస్తామన్నారు. కోర్టు ఆమోదం తెలిపిన అనంతరం ఈ కేసు సీబీఐకి బదిలీ అవుతుందన్నారు. కాగా కోవిల్ పట్టి జ్యూడిషియల్ మేజిస్ట్రేట్ అక్కడి సబ్ జైలును సందర్శించి ఈ కేసుకు సంబంధించిన అన్ని డాక్యుమెంట్లను, సీసీటీవీ రికార్డింగులను అందజేయాలని మదురై బెంచ్.. ఆదేశించింది. ఆయన రేపు వీటిని కోర్టుకు సమర్పించనున్నారు.