బోర్డర్ వాల్ కట్టొచ్చు..ట్రంప్ కి సుప్రీంకోర్టు పర్మిషన్

అమెరికా అధ్యక్షుడు డొనాల్డ్ ట్రంప్ శుక్రవారం రెండు ‘ విజయాలు ‘ సాధించారు. యుఎస్-మెక్సికో మధ్య గోడ నిర్మాణానికి మిలిటరీ నిధులను వినియోగించుకోవడానికి ఆయనకు అనుమతినిస్తున్నట్టు సుప్రీంకోర్టు ప్రకటించింది. మరోవైపు-అమెరికాలో ప్రవేశించగోరే శరణార్థులకు (వలసదారులకు) గేట్ కీపర్ గా వ్యవహరించేందుకు గ్వాటెమాలా కూడా అంగీకరించింది. అంటే తమ బోర్డర్ లోని కంచెను దాటి వారు అమెరికాలో ఎంటర్ కావచ్ఛు. మెక్సికో బోర్డర్లో గోడ నిర్మాణానికి అనుమతి కోరిన ట్రంప్ కు కోర్టు న్యాయమూర్తుల్లో అయిదుగురు అనుకూలంగా తీర్పునివ్వగా.. నలుగురు వ్యతిరేకంగా ఉత్తర్వులిచ్చారు. అక్రమ వలసదారులను అడ్డుకునేందుకు సరిహద్దుల్లో సుమారు వంద మైళ్ళ పొడవునా గోడను నిర్మించేందుకు దాదాపు 2. 5 బిలియన్ డాలర్లను సైనిక నిధులనుంచి వినియోగించుకోవాలని ట్రంప్ ప్రతిపాదించారు. (ఇందుకు కోర్టు గ్రీన్ సిగ్నల్ ఇచ్చింది). నిజానికి మిలిటరీ ఫండ్స్ నుంచి 6. 7 బిలియన్ డాలర్లను డైవర్ట్ చేయాలని ఆయన గత ఫిబ్రవరిలో నిర్ణయించారు. ఆ నేపథ్యంలో కాంగ్రెస్ సభ్యులు పలువురు దీన్ని వ్యతిరేకించారు. దీంతో ట్రంప్ అప్పట్లో నేషనల్ ఎమర్జెన్సీ విధించారు. దిగువ కోర్టుల్లో చాలామంది సెనేటర్లు ట్రంప్ నిర్ణయాన్ని వ్యతిరేకించగా ఆ కోర్టులు వారికి అనుకూలంగా తీర్పులిచ్చాయి. అయితే వాటిని ట్రంప్ సుప్రీంకోర్టులో సవాలు చేశారు. ఆ ఉత్తర్వులను నిలిపివేయాలని అత్యున్నత న్యాయస్థానం శుక్రవారం పేర్కొంది. కాగా-ఈ తీర్పు తనకు పెద్ద విక్టరీ అని ఆయన ట్వీట్ చేశాడు. ‘ బిగ్ విన్ ఫర్ బోర్డర్ సెక్యూరిటీ అండ్ ది రూల్ ఆఫ్ లా ‘ అని ఆయన పేర్కొన్నాడు.