Minister KTR: మునుగోడులో గెలిచినా.. ముందస్తుకు వెళ్లబోము.. స్పష్టం చేసిన మంత్రి కేటీఆర్..
మునుగోడు ఉప ఎన్నికలో టీఆర్ ఎస్ పార్టీ అభ్యర్థి గెలిచినా ముందస్తు ఎన్నికలకు వెళ్లబోమని తెలంగాణ ఐటీ శాఖ మంత్రి కె.తారకరామారావు స్పష్టం చేశారు. టీవీ9 బిగ్ న్యూస్ బిగ్ డిబేట్‌లో ఆయన ఈ అంశంపై మాట్లాడుతూ.. మునుగోడులో..
మునుగోడు ఉప ఎన్నికలో టీఆర్ ఎస్ పార్టీ అభ్యర్థి గెలిచినా ముందస్తు ఎన్నికలకు వెళ్లబోమని తెలంగాణ ఐటీ శాఖ మంత్రి కె.తారకరామారావు స్పష్టం చేశారు. టీవీ9 బిగ్ న్యూస్ బిగ్ డిబేట్‌లో ఆయన ఈ అంశంపై మాట్లాడుతూ.. మునుగోడులో తమ పార్టీ అభ్యర్థి భారీ మెజార్టీతో గెలవడం తథ్యమని ధీమా వ్యక్తంచేశారు. మునుగోడు ఉప ఎన్నిక భవిష్యత్తు సూచిక ఏమాత్రం కాదని అన్నారు. అయితే మునుగోడులో గెలిచినంత మాత్రన భవిష్యత్తు మొత్తం ఇలాగే ఉంటుందనే భ్రమలోనూ తాము ఉండబోమన్నారు. ఒక ఉప ఎన్నిక కోసం నియోజకవర్గంలో భారీ స్థాయిలో మంత్రులు, ఎమ్మెల్యేలు మోహరించడంపై మంత్రి కేటీఆర్ మాట్లాడుతూ.. పార్లమెంటరీ ప్రజాస్వామ్య ప్రక్రియలో ఎన్నికలు కీలకమన్నారు. అన్ని పార్టీలు ఎన్నికను ప్రతిష్టాత్మకంగా తీసుకున్న నేపథ్యంలో తమ పార్టీ ఒక ఛాలెంజ్ గా తీసుకుంటుందన్నారు. తాము ప్రభుత్వంలో వివిధ పదవుల్లో ఉన్నా మొదట టీఆర్ ఎస్ పార్టీ కార్యకర్తలమని చెప్పారు. ఓ కార్యకర్తగా ఎన్నికల సమయంలో ప్రచారం చేయడం సాధారణమైన విషయమేనని అన్నారు. ముఖ్యమంత్రి కేసీఆర్ కూడా ఒక పార్టీ కార్యకర్తనే అని, అందుకే ఒక గ్రామానికి ఇన్ ఛార్జిగా ఉంటూ.. అక్కడ పరిస్థితులను పర్యవేక్షిస్తున్నారని కేటీఆర్ తెలిపారు. గత ఐదు నెలల కాలంలో ప్రధానమంత్రి నరేంద్రమోదీ గుజరాత్ కు దాదాపు 18 నుంచి 20 సార్లు వెళ్లారని, ఎన్నికల కోడ్ రాకుండానే కేంద్రమంత్రులంతా గుజరాత్ లో మోహరించారని, కోట్ల రూపాయల అభివృద్ధి కార్యక్రమాలకు శ్రీకారం చుడుతున్నారని.. ఇది ఎన్నికల్లో లబ్ధి కోసం కాదా అని మంత్రి కేటీఆర్ ప్రశ్నించారు.
క్షేత్రస్థాయిలో తమ పార్టీ నాయకులు మోహరించి ఎన్నికల ప్రచారం చేయడం ఇది మొదటిసారి కాదని, గతంలో ఎమ్మెల్సీ ఎన్నికల్లో సురభి వాణి దేవి, పల్లా రాజేశ్వరరెడ్డి ఎన్నిక సందర్భంగా 77 అసెంబ్లీ నియోజకవర్గాల పరిధిలో ఇదే విధంగా పనిచేసిన విషయాన్ని కేటీఆర్ గుర్తు చేశారు. భవిష్యత్తు రాజకీయాలను మార్చేసే ఎన్నిక మునుగోడు ఉప ఎన్నిక ఏ మాత్రం కాదని, ఈ ఉప ఎన్నికలో తప్పకుండా గెలుస్తామని చెప్పారు. మరో ఏడాదికి పైగా తెలంగాణలో టీఆర్ ఎస్ ప్రభుత్వమే ఉంటుందని, అందుకే నియోజకవర్గంలో ఎటువంటి అభివృద్ధి చేయాలన్నా టీఆర్ ఎస్ తోనే సాధ్యమనే అభిప్రాయంలో మునుగోడు ప్రజలు ఉన్నారని కేటీఆర్ తెలిపారు. కేంద్రప్రభుత్వ నిధులతో అభివృద్ధి చేస్తామని ఓ మేనిఫెస్టోను విడుదల చేశారని, గతంలో దుబ్బాక, హుజురాబాద్ ఉప ఎన్నిక సమయంలోనూ ఇదే విధమైన ప్రచారం చేశారని, గెలిచిన తర్వాత కేంద్రప్రభుత్వ నిధులతో ఏం చేశారని ప్రశ్నించారు.
కోమటిరెడ్డి రాజగోపాల్ రెడ్డి గత శాసనసభ ఎన్నికల్లో గెలిచిన తర్వాత మునుగోడు నియోజకవర్గాన్ని అనాధ చేశారని ఆరోపించారు. మునుగోడు నియోజకవర్గంలో 159 గ్రామ పంచాయతీలు ఉండగా, 115 గ్రామాలకు ఆయన అసలు వెళ్లలేదన్నారు. నియోజకవర్గాన్ని అనాధలా వదిలిపెడితే తాము మాత్రం ఆ నియోజకవర్గాన్ని అభివృద్ధి చేశామన్నారు. నియోజకవర్గం పరిధిలో అతి పెద్ద పారిశ్రామిక పార్క్ ఏర్పాటు చస్త్రశామని, 200 కంపెనీలు శంకుస్థాపనకు రెడీగా ఉన్నాయని, 35వేల మందికి ఉపాధి అవకాశాలు లభించనున్నాయని మంత్రి పేర్కొన్నారు. కాంగ్రెస్ పార్టీ అభ్యర్థి పాల్వాయి స్రవంతి తండ్రి దివంగత పాల్వాయి గోవర్థన్ రెడ్డి ఇరిగేషన్ శాఖ మంత్రిగా ఉన్నప్పటికి.. నియోజకవర్గంలోని సాగు, తాగునీటి సమస్యలను పట్టించుకోలేదన్నారు. తమ ప్రభుత్వం అధికారంలోకి వచ్చిన తర్వాత నియోజకవర్గంలో అనేక రిజర్వాయర్లకు పునాది పడిందని, పని కూడా చాలా వరకు పూర్తికావొచ్చిందని మంత్రి కేటీఆర్ చెప్పారు. ఫ్లోరోసిస్ సమస్యకు శాశ్వత పరిష్కారం చూపించింది సీఏం కేసీఆర్ మాత్రమేనని తెలిపారు. నియోజకవర్గంలో సంక్షేమ, అభివృద్ధి పనులు ఆగలేదని మంత్రి స్పష్టం చేశారు.
మరిన్ని తెలంగాణ వార్తల కోసం చూడండి..
