Telangana: త్వరలోనే ఆ ఖాళీల భర్తీ.. వారికి గుడ్ న్యూస్ చెప్పిన విద్యాశాఖ మంత్రి

Sabitha Indra Reddy : యూనివర్సిటీల వీసీలతో తెలంగాణ విద్యాశాఖ మంత్రి సబితా ఇంద్రారెడ్డి సమావేశమయ్యారు. ఈ సమావేశానికి సీఎస్, ఉన్నత విద్యా మండలి అధికారులు,  వీసీలు హాజరయ్యారు. విద్యార్థులకు నైపుణ్యాభివృద్ధి, ఉద్యోగాల కోసం శిక్షణ కోసం యూనివర్సిటీలు ప్రత్యేక విభాగాలు ఏర్పాటు చేసుకోవాలని మంత్రి సూచించారు. త్వరలో కాంపిటేటివ్ ఎగ్జామ్స్ నోటిఫికేషన్లు రానున్నందున స్టూడెంట్స్‌ను సన్నద్ధం చేసేందుకు యూనివర్సిటీలు ఏర్పాట్లు చేయాలని ఆదేశించారు. అందుకు అవసరమైన నిధులను ప్రభుత్వం వెంటనే కేటాయిస్తుందని తెలిపారు. వర్సిటీల భూములు అన్యాక్రాంతం కాకుండా చూడాలన్నారు. ఇండస్ట్రీలకు యూనివర్సిటీ‌ల అనుసంధానం చేయాలని, అలాగే పరిశోధనలు పెంచాలని ఆదేశించారు.  పరిశ్రమలు, పరిశోధన సంస్థలతో యూనివర్సిటీలు నెట్ వర్క్ ఏర్పాటు చేసుకోవాలని మంత్రి సూచించారు. లక్ష్యసాధన కోసం విద్యార్థుల్లో సంకల్పాన్ని కల్పించడంతో పాటు.. ఆ దిశలో అడ్డంకులను ఎదుర్కొనే ఆత్మస్థైర్యాన్ని నింపాలన్నారు. భవిష్యత్తులో ఉద్యోగ, ఉపాధి అవకాశాలు ఎక్కువగా ఉండే కోర్సులను గుర్తించాలని సబితా ఇంద్రారెడ్డి సూచించారు. వర్సిటీలో చదివే విద్యార్థి ఉద్యోగంతోనే బయటకు వెళ్లేలా కరికులం ఉండాలన్నారు.  ప్రైవేట్ యూనివర్సిటీ‌లకు దీటుగా ప్రభుత్వ వర్శిటీలు తయారు కావాలని ఆకాక్షించారు.

పరిశోధనలే యూనివర్సిటీలకు ప్రామాణికంగా ఉంటాయని.. విద్యార్థులకు నాణ్యమైన బోధన అందించడంలోనూ దోహద పడతాయని మంత్రి అన్నారు. యూనివర్సిటీల్లో ఖాళీలను త్వరలోనే భర్తీ చేస్తామని చెప్పారు. సమావేశంలో సీఎస్ సోమేశ్​ కుమార్, ఉన్నత విద్యా మండలి ఛైర్మన్ లింబాద్రి, విద్యా శాఖ కార్యదర్శి సందీప్ కుమార్ సుల్తానియా తదితరులు పాల్గొన్నారు.

Also Read: కారంపొడి, పచ్చి మిర్చి రెండింటిలో ఏది బెటర్.. ఈ విషయాలు మీరు అస్సలు నమ్మలేరు

Viral Photo: అపరంజి బొమ్మ.. అందాల జాబిల్లి.. అప్పట్లో తెలుగునాట సెన్సేషన్.. ఎవరో గుర్తించారా..?