చంద్రబాబుపై కేటీఆర్ ఫైర్

నాగర్‌కర్నూల్: ఏపీ సీఎం చంద్రబాబుపై టీఆర్ఎస్ వర్కింగ్ ప్రెసిడెంట్ కేటీఆర్ విమర్శలు గుప్పించారు. చంద్రబాబు వ్యవసాయం దండగ అని అన్నారని పేర్కొన్నారు. ఇప్పుడేమో తెలంగాణ ప్రభుత్వం ప్రవేశపెట్టిన రైతుబంధు పథకాన్ని చంద్రబాబు కాపీ కొట్టారని విమర్శించారు. నాగర్‌కర్నూల్‌లో టీఆర్‌ఎస్‌ సన్నాహక సమావేశంలో కేటీఆర్ మాట్లాడారు. రెండో హరితవిప్లవానికి కేసీఆర్‌ నాంది పలికారని తెలిపారు.కేసీఆర్‌ ఆలోచన దేశానికి ఆదర్శమన్నారు.

ఏప్రెల్ నుంచి పెంచిన పెన్షన్ రూ 2,016 అందజేస్తామని ప్రకటించారు. 57 ఏళ్లకే ఆసరా పథకాన్ని అమలు చేస్తామని పేర్కొన్నారు. అద్భుత సంక్షేమ కార్యక్రమాలు అమలు చేశామని గుర్తుచేశారు. పాలమూరు పచ్చబడుతుంటే కాంగ్రెస్‌ నేతల కళ్లు ఎర్రబడుతున్నాయని ధ్వజమెత్తారు. పాలమూరులోని ప్రతి ఎకరాకు నీరందిస్తామని వెల్లడించారు. పాలమూరు ప్రాజెక్టుకు జాతీయ హోదాను మోదీ పట్టించుకోలేదని ఆరోపించారు. ఇక వచ్చే ఎన్నికల్లో ఎన్డీయేకు 150-160 స్థానాలకు మించవని జోస్యం చెప్పారు. వచ్చే ఎన్నికల్లో రాష్ట్రంలో 16 పార్లమెంట్‌ స్థానాలు టీఆర్ఎస్ గెలిచి తీరుతుందని ధీమా వ్యక్తం చేశారు.