Aug 21, 2021 | 2:00 PM
Hyderabad Street Race: హైదరాబాద్ నగర వాసులకు రేసింగ్ అనుభూతిని పంచేందుకు ఫార్ములా రేసులు రాబోతున్నాయి. ఆగష్టు 22న ఆసక్తికరమైన స్పోర్ట్స్ కార్ రేసింగ్ జరగనుంది. స్ర్టీట్ సర్క్యూట్ ప్రమోషన్ ప్రైవేట్ లిమిటెడ్ వారు ఈ కార్యక్రమాన్ని గచ్చిబౌలిలోని ఐటీసీ కోహినూర్ పక్క లైన్ లో నిర్వహిస్తున్నారు. ఆదివారం మధ్యా్‌హ్నం 3 గంటలకు ప్రారంభమయ్యే ఈ కార్యక్రమానికి ముఖ్య అతిథులుగా తెలంగాణ రాష్ట్ర పురపాలక శాఖ మంత్రి కె తారక రామారావు, హైదరాబాద్ నగర పోలీస్ కమీషనర్ అంజనీ కుమార్, సినీ హిరో విశాల్ ముఖ్య అతిథులుగా హాజరవుతున్నారు.
అలాగే వచ్చే ఏడాది ఫిబ్రవరిలో జరుగబోయే ఫార్ములా-4 రేసులను హైదరాబాద్‌తో పాటు న్యూఢిల్లీ, చెన్నై, కోయంబత్తూరులోనూ నిర్వహించనున్నట్టు రేసింగ్ ప్రమోషన్స్‌ (ఆర్‌పీపీఎల్‌) నిర్వాహకులు వెల్లడించారు. ఫెడరేషన్‌ ఇంటర్నేషనల్‌ ఆటోమొబైల్‌ (ఎఫ్‌ఐఏ) మద్దతుతో ఎఫ్‌-4 ఇండియన్‌ చాంపియన్‌షిప్‌, ఫార్ములా రీజినల్‌ ఇండియన్‌ చాంపియన్‌షిప్‌ పోటీలను ఈ నాలుగు నగరాలలో నిర్వహించనున్నారు. ఎఫ్‌-3 కార్లతో నిర్వహించబోయే ఈ పోటీలు భారత్‌లో ఇదే తొలిసారి. వీటి నిర్వహణ కోసం హైదరాబాద్‌లో ఇప్పటికే వంద కోట్ల రూపాయలను కార్లు, మౌలిక వసతులపై వెచ్చించినట్టు నిర్వాహకులు తెలిపారు. 2022లో ప్రారంభం అయ్యే ఈ రేసింగ్ ఛాంపియన్‌షిప్‌ ఒక నెల పాటు కొనసాగుతుంది. నెలలో ఐదు వేదికల్లో పోటీలు జరుగుతాయి.
