Dilsukhnagar Blasts: నేటితో దిల్‌సుఖ్‌నగర్ జంట పేలుళ్లకు ఏడేళ్లు పూర్తి..!

ఎప్పటిలాగే ఆ సాయంత్రం నగరంలోని దిల్‌సు‌ఖ్‌నగర్ బిజీబిజీగా ఉంది. హోటళ్లు, షాపింగ్ మాల్‌లు అన్నీ కిక్కిరిసి ఉన్నాయి. ఆ ప్రదేశంలో పేరుగాంచిన సాయిబాబా ఆలయానికి భక్తుల రాకపోకలు కొనసాగుతున్నాయి. పలు ప్రదేశాల నుంచి అక్కడకు వెళ్లిన నగరవాసులు ఎవరి పనుల్లో వారు బిజీగా ఉన్నారు. కానీ ఆ లోపే ఎవ్వరూ ఊహించని దుర్ఘటన చోటుచేసుకుంది. వరుస బాంబు పేలుళ్లతో దిల్‌సుఖ్ నగర్ ఉలిక్కిపడింది. ఒకచోట తేరుకునే లోపే మరోచోట బాంబ్ బ్లాస్ట్ జరిగింది. ఈ దుర్ఘటనలో ఎంతోమంది ప్రాణాలు కోల్పోయారు. మరికొందరు నిరాశ్రయులుగా మిగలగా.. వందలాది మంది గాయపడ్డారు. ఈ దుర్ఘటన జరిగి నేటితో సరిగ్గా ఏడేళ్లు.

ఒకసారి ఆ దారుణాన్ని గుర్తు చేసుకుంటే.. ఆ నెత్తుటి గాయం ఎంతోమంది ఇప్పటికీ పచ్చిగా సలపరిస్తూనే ఉంటుంది. 2013 ఫిబ్రవరి 21న సాయంత్రం గం.6.45ని.లకు దిల్‌సుఖ్‌నగర్‌లో ఉగ్రవాదులు బాంబు పేలుళ్లకు పాల్పడ్డారు. ఈ పేలుళ్లలో 17 మంది ప్రాణాలు కోల్పోగా, వందలాది మందికి గాయాలయ్యాయి. దీంతో ఈ పేలుళ్లపై మొదట మలక్ పేట, సరూర్ నగర్ పోలీస్ స్టేషన్లలో కేసులు నమోదు అయ్యాయి. ఆ తర్వాత 2013 మార్చి 13న కేంద్ర ప్రభుత్వ ఆదేశంతో చర్లపల్లి సెంట్రల్ జైలులో ప్రత్యేక న్యాయస్థానం ఏర్పాటు చేసిన నేషనల్ ఇన్వెస్టిగేషన్ ఏజెన్సీ (ఎన్ఐఎ) దర్యాప్తును చేపట్టింది.

ఈ క్రమంలో మూడేళ్లపాటు విచారణ జరిపిన ఎన్‌ఐఎ.. 157 మంది సాక్ష్యాలను రికార్డ్ చేసింది. 502 డాక్యుమెంట్లు, 201 మెటీరియల్‌ను పరిశీలించింది. నిందితులకు వ్యతిరేకంగా పక్కా సాక్ష్యాధారాలు సంపాదించింది. దీంతో కోర్టులో నిందితులకు వ్యతిరేకంగా ఎన్ఐఎ లాయర్లు బలమైన వాదనలు వినిపించారు. అలా.. 2016 నవంబరు 7న ఈ కేసుకు సంబంధించిన వాదనలు పూర్తయ్యాయి. ఇండియన్ ముజాహిదినే ఈ పేలుళ్లకు పాల్పడినట్టు తేలింది. నిందితులుగా ఉన్న అసదుల్లా అఖ్తర్, వకాస్‌, తెహసీన్‌ అఖ్తర్, యాసిన్‌ భత్కల్‌, ఎజాజ్‌ షేక్‌‌లు దోషులని 2016, డిసెంబర్ 13న ఎన్ఐఎ కోర్టు నిర్ధారించింది. అంతేకాదు వారికి ఉరి శిక్ష విధిస్తూ కోర్టు తీర్పు వెల్లడించింది. అయితే ఇందులో ప్రధాన నిందితుడైన యాసిన్ భత్కల్ పాకిస్థాన్‌లో తలదాచుకోగా.. మిగిలిన నిందితులు ప్రస్తుతం చర్లపల్లి జైల్లో ఉన్నారు.