Today Tomato Price: టమాట మళ్లీ ఢమాల్.. కోత కూలి కూడా దండగే.. పాపం రైతన్నలు..
టమాటా ధరలు రైతులను కన్నీళ్లు పెట్టిస్తున్నాయి. ఒక్కోసారి సెంచరీకి చేరే కిలో టమోటా రేటు..ఇప్పుడు ఒక్కసారిగా ఢమాల్ మంది. ఎప్పుడు ఏ ధర ఉంటుందో అర్థంకాక రైతులు అయోమయానికి గురవుతున్నారు.
కరీంనగర్లో టమాటా ధరలు తీవ్రంగా పడిపోయాయి. కిలో 3 నుంచి 4 రూపాయలే పలుకుతోన్న ధరలు బెంబేలెత్తిస్తున్నాయి. రైతులు ఆందోళనలో ఉన్నారు. కూలీలు, రవాణా ఖర్చులు సైతం రాక రైతులు దిగాలుపడతున్న స్థితి ఆందోళనకరంగా మారింది. ధరపతనం దారుణంగా అవడంతో రైతులు తీవ్ర అసంతృప్తితో ఉన్నారు. ధరలు పడిపోతున్నా.. ప్రభుత్వం చోద్యం చూస్తోందని ఆగ్రహించారు. మద్దతు ధర కల్పిస్తామని హామీ ఇవ్వడమే కానీ.. ఆచరణ మాత్రం శూన్యమంటున్నారు. రవాణా ఖర్చులు కూడా రాక అవస్థలు పడుతున్నామని ఆవేదన చెందారు. తక్షణమే మద్దతు ధర కల్పించి ఆదుకోవాలని డిమాండ్ చేస్తున్నారు.
టన్నులకొద్దీ టమాటాలు పంట పొలాల్లోనే కుళ్ళిపోతున్నాయి. లేదా చెత్తకుప్పలుగా మారుతున్నాయి. రైతన్న కష్టం చిల్లిగవ్వకు కొరగాని పరిస్థితి ఏర్పడింది. కొద్దిరోజులుగా మార్కెట్కు సరుకు ఓ మోస్తారుగా వస్తున్నా.. రేటు పలకడం లేదు. వ్యాపారస్తులు.. దళారులు కుమ్మక్కై రేటు రాకుండా చేస్తున్నారని రైతులు ఆరోపిస్తున్నారు. ప్రభుత్వమే చొరవ చూపి రైతులను ఆదుకోవాలని అధికారులను వేడుకుంటున్నారు. సరైనా ధర లేకపోవడంతో టమాటాలను పశువులకు మేతగా వేస్తున్నారు. కూలీ రేట్ కూడా రాకపోవడంతో కొందరు రైతులు టమాట తెంపాలంటేనే భయపడుతున్నారు.
ఆరుగాలం కష్టించి.. పండించిన పంటలకు గిట్టుబాటు లేక రైతులు విలవిలలాడుతున్నారు. టమాటా సాగు చేసిన రైతులందరిదీ ఇదే దుస్థితి. ఏ రైతును కదలించినా.. సరైన ధర కల్పించడం లేదని రైతులు కన్నీరు మున్నీరవుతున్నారు.. సాగుచేసిన టమాటా పంట రోడ్డు పాలైంది. కాలం కలిసి రావడంతో కొంత మేరకు ఆశించిన దిగుబడులు వచ్చాయనుకుంటే, ధర తగ్గిపోవడంతో ఆందోళనకు గురవుతున్నారు రైతులు.
మరిన్ని తెలంగాణ వార్తల కోసం ఈ లింక్ క్లిక్ చేయండి..