ఎమ్మెల్యే హరిప్రియ ఎన్నికల ప్రచారంపై రాళ్లదాడి

టీఆర్ఎస్‌లో చేరిన ఇల్లెందు కాంగ్రెస్ ఎమ్మెల్యే హరిప్రియ నాయక్‌కు నియోజకవర్గంలోని కాంగ్రెస్ కార్యకర్తలు షాక్ ఇచ్చారు. అయితే, ఇవాళ ఆమె ఎన్నికల ప్రచారంపై రాళ్ల దాడి జరిగింది. కాంగ్రెస్ పార్టీ తరపున గెలిచి టీఆర్ఎస్‌లో ఎలా చేరతారని అక్కడి ప్రజలు ప్రశ్నించారు. పార్టీ మారాలనుకుంటే ఎమ్మెల్యే పదవికి రాజీనామా చేయాలని డిమాండ్ చేశారు. దీంతో టీఆర్ఎస్, కాంగ్రెస్ కార్యకర్తల మధ్య ఘర్షణ తలెత్తింది. వాగ్వాదం, తోపులాట తర్వాత.. ఇరు వర్గాలు ఒకరిపై ఒకరు రాళ్లు రువ్వుకోవడంతో పరిస్థితి ఉద్రిక్తంగా మారింది.  రాళ్ల దాడిలో పలువురికి గాయాలయ్యాయి. ఘటనాస్థలానికి చేరుకున్న పోలీసులు.. ఇరువర్గాలను చెదరగొట్టారు. గాయాలపాలైనవారిని ఆస్పత్రికి తరలించారు. గ్రామంలో బందోబస్తు ఏర్పాటు చేశారు. ఘటనపై కేసు నమోదు చేసి విచారణ చేపట్టారు. గత అసెంబ్లీ ఎన్నికల్లో ఉమ్మడి ఖమ్మం జిల్లాల్లో మొత్తం ఆరుగురు కాంగ్రెస్ ఎమ్మెల్యేలు విజయం సాధించగా… వారిలో నలుగురు టీఆర్ఎస్‌లో చేరిపోయారు. ఇల్లెందులో కాంగ్రెస్ అభ్యర్థిగా విజయం సాధించిన హరిప్రియ నాయక్‌కు కామేపల్లి మండలంలోనే మంచి మెజార్టీ రావడం గమనార్హం.