నాలుగు బిల్లులకు శాసనమండలి ఆమోదం
తెలంగాణ శాసనమండలి ఆ నాలుగు బిల్లులకు ఆమోదం తెలిపింది. జీహెచ్ఎంసీ సహా నాలుగు చట్ట సవరణ బిల్లుల‌ను మండలిలో ఆయా శాఖ‌ల మంత్రులు ప్రవేశపెట్టారు.
తెలంగాణ శాసనమండలి ఆ నాలుగు బిల్లులకు ఆమోదం తెలిపింది. జీహెచ్ఎంసీ సహా నాలుగు చట్ట సవరణ బిల్లుల‌ను మండలిలో ఆయా శాఖ‌ల మంత్రులు ప్రవేశపెట్టారు. అనంతరం బిల్లులపై చ‌ర్చించి.. స‌భ్యులు అడిగిన ప్ర‌శ్న‌ల‌కు మంత్రులు స‌మాధానం ఇచ్చారు. అనంతరం ఈ నాలుగు బిల్లుల‌ను ఆమోదిస్తున్న‌ట్లు శాసనమండలి చైర్మ‌న్ గుత్తా సుఖేందర్ రెడ్డి ప్రకటించారు. అనంతరం మండ‌లిని నిర‌వ‌ధికంగా వాయిదా వేస్తున్న‌ట్లు ఆయన తెలిపారు.
గ్రేటర్ హైదరాబాద్ మున్సిపల్ కార్పొరేషన్ సవరణ బిల్లు-2020ను రాష్ట్ర మున్సిపల్ శాఖ మంత్రి కేటీ. రామారావు శాసన మండలిలో ప్రవేశపెట్టారు. ఇండియన్ స్టాంప్ బిల్లు(తెలంగాణ)2020, తెలంగాణ అగ్రికల్చర్ ల్యాండ్ సవరణ బిల్లు (కన్వర్షన్ నాన్ అగ్రికల్చర్ ల్యాండ్)- 2020ను శాస‌న‌స‌భా వ్య‌వ‌హారాల శాఖ మంత్రి ప్ర‌శాంత్ రెడ్డి ప్రవేశపెట్టగా, క్రిమినల్ ప్రొసీజర్ కోడ్ సవరణ బిల్లు – 2020ను న్యాయ శాఖ మంత్రి ఇంద్ర‌క‌ర‌ణ్ రెడ్డి ప్రవేశపెట్టారు. ఈ నాలుగు బిల్లులకు నిన్న శాస‌న‌స‌భ ఆమోదం తెలిపిన ఈ బిల్లులపై ఇవాళ మండలిలో చర్చించారు. అనంతరం నాలుగు బిల్లులకు ఆమోదం తెలుపుతున్నట్లు ఛైర్మన్ సుఖేందర్ రెడ్డి ప్రకటించారు.
మండలిలో ఆమోదం పొందిన బిల్లులుః
1. ఇండియన్ స్టాంప్ బిల్లు (తెలంగాణ) 2020ః * భూముల ప్రాథమిక విలువ నిర్ధరణకు సంబంధించి సబ్ రిజిస్ట్రార్లకు 47ఏ కింద విచక్షణాధికారాలను తొలగిస్తూ స్టాంపులు, రిజిస్ట్రేషన్ల చట్టానికి సవరణ చేశారు.
2. తెలంగాణ అగ్రికల్చర్ ల్యాండ్ సవరణ బిల్లు(కన్వర్షన్ నాన్ అగ్రికల్చర్ ల్యాండ్)- 2020ః * వ్యవసాయ భూములను వ్యవసాయేతరంగా బదలాయించేందుకు అధికారులకు విచక్షణాధికారాలు రద్దు చేశారు. * ధరణి ద్వారానే ఆన్లైన్ విధానంలో దరఖాస్తు చేసుకునేలా నాలా చట్టాన్ని సవరించారు. * వ్యవసాయేతర ఆస్తులకు కూడా గుర్తింపు సంఖ్య ఇచ్చేలా చట్టానికి సవరణలు చేశారు.
3. జీహెచ్ఎంసీ సవరణ బిల్లు – 2020ః * మహిళలకు 50 శాతం రిజ‌ర్వేష‌న్లు క‌ల్పిస్తూ సవరణ చేశారు. * 10 శాతం గ్రీన్ బ‌డ్జెట్‌కు నిధుల కేటాయింపు. * 10 సంవ‌త్స‌రాలకు ఒక‌సారి రిజ‌ర్వేష‌న్ల మార్పున‌కు సవరణ. * నాలుగు ర‌కాల వార్డు వాలంటీర్ల క‌మిటీల ఏర్పాటుకు సవరణ. * ఎన్నిక‌ల నిర్వ‌హ‌ణ‌పై ప్ర‌భుత్వాన్ని ఎస్ఈసీని సంప్ర‌దించాల‌ని చట్ట సవరణ.
4. క్రిమినల్ ప్రొసీజర్ కోడ్ సవరణ బిల్లు – 2020ః * హైకోర్టు సూచన మేరకు నిందితులకు పూచీకత్తు అంశానికి సంబంధించిన సీఆర్పీసీ చట్టాన్ని సవరించారు.
