శాంతించిన కృష్ణమ్మ.. శ్రీశైలం గేట్లన్నీ మూసివేత
ఎగువ ప్రాంతాల్లో వర్షాలు తగ్గుముఖం పట్టడంతో కృష్ణానదికి వరద క్రమంగా తగ్గుతోంది. రాష్ట్రంలో కృష్ణమ్మ పరవళ్లు తొక్కుతుండగా.. కర్నాటకలో...
Srisailam Dam Spillway Gates :ఎగువ ప్రాంతాల్లో వర్షాలు తగ్గుముఖం పట్టడంతో కృష్ణానదికి వరద క్రమంగా తగ్గుతోంది. రాష్ట్రంలో కృష్ణమ్మ పరవళ్లు తొక్కుతుండగా.. కర్నాటకలో వరద ఉధృతి కొంత తగ్గింది. నిన్న ఉదయం ఆల్మట్టి ప్రాజెక్టుకు రెండున్నర లక్షల క్యూసెక్కులకు పైగా ఇన్ ఫ్లో ఉండగా.. సాయంత్రానికి రెండు లక్షల క్యూసెక్కులకు తగ్గింది. దీంతో దిగువకు ఔట్ ఫ్లోను లక్ష క్యూసెక్కులకు తగ్గించారు. అయితే నిన్న సాయంత్రానికి జూరాల ప్రాజెక్టుకు భారీగా ఇన్ ఫ్లో కొనసాగుతున్నది.
ప్రస్తుతం శ్రీశైలం ప్రాజెక్టు ఇన్ఫో 73,583 క్యూసెక్కులుగా ఉండగా.. ఔట్ ఫ్లో 30, 986 క్యూసెక్కులుగా నమోదైంది. ప్రాజెక్టు పూర్తి స్థాయి నీటిమట్టం 885 అడుగులు కాగా, ప్రస్తుత నీటిమట్టం 884.20అడుగులుగా ఉంది. నీటి నిల్వ సామర్థ్యం 215.80 టీఎంసీలు కాగా, ప్రస్తుత నీటి నిల్వ 210.99 టీఎంసీలకు చేరింది. కుడిగట్టు జల విద్యుత్ కేంద్రంలో విద్యుదుత్పత్తి కొనసాగుతోంది.