ఇది కదా ఆటంటే! వింబుల్డన్‌ జకోవిచ్‌దే

జులై 14, 2019..ప్రపంచ క్రీడా అభిమానులు మర్చిపోలేని రోజు. ఒకవైపు క్రికెట్ వరల్డ్ కప్ ఫైనల్ మ్యాచ్..సూపర్ ఓవర్ వరకు సాగి..అభిమానులకు కిక్ ఇస్తే.. మరోవైపు టెన్నీస్ చరిత్రలోనే అద్భుతమైన మ్యాచ్ జరిగింది. అసలు అదేదో యుద్దంలా ఈ పోరు సాగిందంటే ఆశ్యర్యం కాదు. రోజర్‌ ఫెదరర్‌, సెర్బియా స్టార్‌ నొవాక్‌ జకోవిచ్‌ మధ్య వింబుల్డన్‌ ఫైనల్‌ లాంటి మ్యాచ్ భవిష్యత్‌లో జరుగుతుందని చెప్పడానికి కూడా వీల్లేదు. కప్ గెలవకపోతే ప్రాణం పోతుందేమో, దేశం నుంచి వెలి వేస్తారేమో అన్నంతగా ఈ వీరులు టెన్నీస్ బాల్‌తో యుద్దం చేశారు.  ఎప్పటికప్పుడు ఆధిక్యం చేతులు మారుతూ.. అనుక్షణం ఉత్కంఠ రేపుతూ సాగిన వింబుల్డన్‌ పురుషుల సింగిల్స్‌ తుది సమరంలో ఆఖరికి  జకోవిచ్‌నే విజయం వరించింది.

రికార్డు స్థాయిలో ఇంచుమించు 5 గంటలు వరకు సాగిన ఈ ఫైనల్ పోరులో ఫెదరర్‌ను ఓడించి జకోవిచ్‌ వింబుల్డన్‌ టైటిల్‌ను గెలుచుకున్నాడు. నొవాక్‌ కెరీర్‌లో ఇది ఐదో వింబుల్డన్‌ టైటిల్‌. మొత్తం మీద 16వ గ్రాండ్‌ స్లామ్‌ టైటిల్‌. ఫైనల్ పోరులో..  జకోవిచ్‌ 7-6 (7-5), 1-6, 7-6 (7-4), 4-6, 13-12 (7-3)తో ఫెదరర్‌ను ఓడించాడు. ఈ మ్యాచ్‌ ఆరంభం నుంచి జకోవిచ్, రోజర్‌ గొప్పగా పోరాడారు. ఐదు సెట్ల పోరాటంలో మూడు సెట్లను టైబ్రేక్‌లే తేల్చాయి. ఏస్‌ల రారాజు ఫెడరర్‌ ఏకంగా 25 ఏస్‌లు సంధించినప్పటికీ టైబ్రేక్‌లో వెనుకబడటంతో రన్నరప్‌తో సరిపెట్టుకున్నాడు. విజేత జొకోవిచ్‌ 10 ఏస్‌లు సంధించి, 52 అనవసర తప్పిదాలు చేశాడు. స్విస్‌ స్టార్‌ 61 అనవసర తప్పిదాలతో మూల్యం చెల్లించుకున్నాడు. 94 విన్నర్లు కొట్టిన ఫెడరర్, ఆరుసార్లు డబుల్‌ ఫాల్ట్‌ చేశాడు. జొకోవిచ్‌ 54 విన్నర్లు కొట్టాడు. విజేతగా నిలిచిన జొకోవిచ్‌కు 23 లక్షల 50 వేల పౌండ్లు (రూ. 20 కోట్ల 26 లక్షలు)… రన్నరప్‌ ఫెడరర్‌కు 11 లక్షల 75 వేల పౌండ్లు (రూ. 10 కోట్ల 13 లక్షలు) ప్రైజ్‌మనీగా లభించాయి.