ఆ సంస్థ నన్ను మోసం చేసింది- ధోని

ప్రముఖ రియల్ ఎస్టేట్ సంస్థ ఆమ్రపాలి తనను మోసం చేసిందంటూ టీమిండియా మాజీ కెప్టెన్ మహేంద్ర సింగ్ ధోని సుప్రీం కోర్టును ఆశ్రయించారు. ఆమ్రపాలి సంస్థకు ప్రచారకర్తగా ఉన్న సమయంలో తనకు చెల్లించాల్సిన బకాయిలు చెల్లించకపోవడంతో పాటు ఓ ఇంటి విషయంలోనూ ఆ సంస్థ తనను మోసం చేసిందని ధోని తెలిపాడు. 2009-2016 మధ్య కాలంలో ధోనీని ప్రచారకర్తగా మార్చుకోవడంతోపాటు పలు వ్యాపార విషయాల్లో ఆమ్రపాలి సంస్థ ఒప్పందం కుదుర్చుకుంది. అయితే, ధోనీకి చెల్లించాల్సిన రూ.40కోట్ల బకాయిలను ఆ సంస్థ ఇంతవరకూ చెల్లించలేదు. రాంచీలోని అమ్రపాలి సఫారీలో ధోని ఒక పెంటౌజ్‌ బుక్‌ చేసుకున్నాడు. ఆ ఇల్లు విషయంలోనూ ధోనికి యాజమాన్య హక్కులు కల్పించలేదు.

మరోవైపు ఆమ్రపాలి సంస్థ గత కొద్దికాలంగా ఆర్ధిక సమస్యల్లో చిక్కుకుంది. అంతేకాకుండా ఆ సంస్థపై సుప్రీం కోర్టులో కేసు కూడా నడుస్తోంది. ఆమ్రపాలి వద్ద ఇల్లు కొనుగోలు చేసిన 46 వేల మంది సంస్థ తమను మోసం చేసిందంటూ కోర్టును ఆశ్రయించారు. దీనిపై స్పందించిన సుప్రీం కోర్టు ఆ సంస్థకు చెందిన ఉప సంస్థలు, డైరెక్టర్ల ఆస్తుల వివరాలు సమర్పించాలని ఆదేశాలు జారీ చేసింది.  కాగా మధ్యలో ఆపేసిన పనులు పూర్తి చేసే బాధ్యతను నేషనల్ బిల్డింగ్స్ కన్‌స్ట్రక్షన్ కార్పొరేషన్‌కు సుప్రీం కోర్టు జనవరి 25న తెలిపింది. ఫిబ్రవరి 28న ఆ సంస్థకు చెందిన సీఎండీ అనిల్‌ శర్మ, ఇద్దరు డైరెక్టర్లు శివ్‌ దీవాని, అజయ్‌ కుమార్‌ను పోలీస్‌ కస్టడీలోకి తీసుకోవాలని ఆదేశించింది.