నాతోనే ఉన్న వాళ్లే నా కెప్టెన్సీ పోవడానికి కారణం: గంగూలీ

Sourav Ganguly: దాదా.. దాదాపు ఆరేళ్ల పాటు జట్టుకు నాయకత్వం వహించిన సౌరవ్ గంగూలీ ఎన్నో మరపురాని విజయాలను అందించారు. ముఖ్యంగా 2003 ప్రపంచకప్‌లో జట్టును ముందుండి నడిపించిన తీరు అత్యద్భుతం. అయితే 2005లో గంగూలీ అనూహ్యంగా తన కెప్టెన్సీని కోల్పోయారు. దీనికి అనేక కారణాలు అప్పట్లో వెలుగులోకి వచ్చాయి. ముఖ్యంగా అప్పటి జట్టు కోచ్ గ్రెగ్ చాపెల్ పాత్ర అత్యధికంగా ఉన్నట్లు విమర్శలొచ్చాయి. దీనిపై గంగూలీ ఎట్టకేలకు సమాధానమిచ్చారు.

కాగా.. తన కెప్టెన్సీ పోవడానికి గ్రెగ్ చాపెల్ మాత్రమే కారణం కాదని, తన చుట్టూ ఉన్న అనేకమంది కారణమని గంగూలీ చెప్పారు. ‘2003లో ఫైనల్ వరకూ వెళ్లి ఓటమి పాలవ్వడం నాకు చాల బాధ కలిగించింది. దాంతో 2007లో ఎలాగైనా ప్రపంచకప్ గెలవాలని కలలు కన్నాను. కానీ 2005లో నన్ను కెప్టెన్సీ నుంచి తొలగించడంతో తీవ్ర దిగ్బాంతికి గురయ్యాను. అంతేకాకుండా మొదట వన్‌డే జట్టు నుంచి తొలగించారు.

వివరాల్లోకెళితే.. కెప్టెన్ పదవి నుంచి నన్ను తొలగించాలనే ఆలోచన మాత్రం తొలుత చాపెల్ బుర్రలోనే పుట్టిందని మాత్రం చెప్పగలను, కానీ నాతోనే ఉన్న వాళ్లే నా కెప్టెన్సీ పోవడానికి కారణమయ్యారు అని గంగూలీ తెలిపారు. ఇదిలా ఉంటే అప్పటి కోచ్ గ్రెగ్ చాపెల్ గంగూలీకి వ్యతిరేకంగా బీసీసీఐకి ఓ మెయిల్ పంపాడు. ఈ మెయిల్ లీక్ అవడంతో చాపెల్ వల్లే గంగూలీ కెప్టెన్సీ కోల్పోయాడంటూ అప్పట్లో పెద్ద దుమారమే రేగింది.

Also Read: ఇన్‌స్టాగ్రామ్ రీల్స్: రీలింగ్ చేస్తున్న పలువురు సెలెబ్రిటీలు