షాకింగ్.. నగరంలో కరోనా వైరస్ ఉందంటూ.. గాంధీకి ప్రైవేట్ ఆస్పత్రి లేఖ..!

ప్రంపచాన్ని వణికిస్తోన్న కరోనా వైరస్.. ఇప్పుడు మన దేశాన్ని కూడా వణికిస్తోంది. ఇప్పటికే కేరళలో మూడు పాజిటివ్ కేసులు నమోదవ్వడంతో.. ఈ వైరస్ పేరు చెబితేనే ఉలిక్కిపడుతున్నారు. అలాంటి భయంకరమైన వైరస్.. ఇప్పుడు మన భాగ్యనగరాన్ని కూడా వణికిస్తోంది. ఓ వైపు ఈ వైరస్‌కు సంబంధించి గాంధీ ఆస్పత్రిలో ప్రత్యేక హెల్ప్ డెస్క్ కౌంటర్లు ఏర్పాటు చేయగా.. మరోవైపు నగరంలో కరోనా వ్యాధి ఉందంటూ పుకార్లు షికార్లు చేస్తున్నాయి. నగరంలో కరోనా భయం లేదని ఆరోగ్యశాఖ మంత్రి ఈటెల స్పష్టం చేశారు కూడా. అయితే గురువారం ఉదయం గాంధీ ఆస్పత్రికి వచ్చిన ఓ లేఖ కలకలం సృష్టిస్తోంది. తమ ఆస్పత్రిలోని ఓ ఆరు నెలల శిశువుకు కరోనా వైరస్ లక్షణాలు ఉన్నాయని.. మీరు కూడా ఓ సారి చెక్ చేయండంటూ ఓ ప్రైవేట్ ఆస్పత్రికి చెందిన వైద్యులు.. గాంధీ ఆస్పత్రి సూపరింటెండెంట్‌కు లేఖ రాశారు. ఆ లేఖలో ఆరు నెలల శిశువుకు కరోనా ఉన్నట్లు పేర్కొన్నారు. అయితే ఈ లేఖపై గాంధీ వైద్యులు మండిపడుతున్నారు.

అసలు గాంధీలో వైరాలజీ ల్యాబ్ ఉంటే.. ప్రైవేట్ ఆస్పత్రిలో ఈ పరీక్షలు ఎలా చేశారంటూ అసహనం వ్యక్తం చేస్తున్నారు. లేనిపోని వదంతులు సృష్టిస్తున్నారని ఆగ్రహం వ్యక్తం చేస్తున్నారు. దీనిపై అధికారులు సీరియస్ అయ్యారు. కేంద్ర వైద్య ఆరోగ్య శాఖకు ఫిర్యాదు చేసే యోచనలో ఉన్నారు. కాగా.. కరోనాకు సంబంధించి గాంధీలో ప్రత్యేక హెల్ప్ డెస్క్ ఏర్పాటు చేసిన విషయం తెలిసిందే.