Saaho: ప్రీ రిలీజ్ వేడుకకు ముహూర్తం ఖరారు.. ఎక్కడంటే..!

యంగ్ రెబల్‌స్టార్ ప్రభాస్ నటించిన భారీ యాక్షన్ ఎంటర్‌టైనర్ ‘సాహో’. సుజీత్ దర్శకత్వం వహించిన ఈ చిత్రం ఈ నెల 30న ప్రేక్షకుల ముందుకు రానుంది. ఈ నేపథ్యంలో ప్రీ రిలీజ్ వేడుకకు ముహూర్తం ఖరారు అయింది. ఈ నెల 18న సాహో ప్రీ రిలీజ్ వేడుక జరగనున్నట్లు చిత్ర యూనిట్ అధికారికంగా ప్రకటించింది. ఆ రోజు సాయంత్రం 5గంటలకు హైదరాబాద్‌లోని ఫిల్మ్ సిటీలో జరిగే ఈ కార్యక్రమంలో సాహో యూనిట్‌తో పాటు పలువురు ప్రముఖులు పాల్గొనబోతున్నట్లు తెలుస్తోంది. ఇక ఈ కార్యక్రమంలోనే సాహో ట్రైలర్ కూడా విడుదల కాబోతున్నట్లు సమాచారం.

కాగా భారీ బడ్జెట్‌తో తెరకెక్కిన ఈ మూవీలో ప్రభాస్ సరసన శ్రద్దా కపూర్ నటించగా.. జాకీ ష్రాఫ్, చుంకీ పాండే, అరుణ్ విజయ్, నీల్ నితిన్ ముఖేష్, మందిరా బేడీ, మురళీ శర్మ, వెన్నెల కిశోర్ తదితరులు కీలక పాత్రలలో కనిపించనున్నారు. యూవీ క్రియేషన్స్ నిర్మించిన ఈ చిత్రాన్ని తెలుగు, తమిళ్, హిందీలో ఒకేరోజు విడుదల చేయనున్నారు. ఇప్పటికే పోస్టర్లు, టీజర్లతో ఆకట్టుకున్న ఈ మూవీపై టాలీవుడ్‌తో పాటు అటు కోలీవుడ్, బాలీవుడ్‌లోనూ భారీ అంచనాలు ఉన్నాయి.