చైనా చెప్పిన మరో ‘చేటు’.. సరికొత్త ‘బుబోనిక్ ప్లేగు’

ఇప్పటికే కరోనావైరస్  వ్యాప్తికి చైనాయే కారణమని ప్రపంచ దేశాలు గొంతెత్తి ఆరోపిస్తుండగా.. ఇప్పుడు ఆ దేశం మరో కొత్త షాకింగ్ నిజాన్ని బయటపెట్టింది. ప్లేగు వ్యాధిలో కొత్త రకం రుగ్మత అయిన ‘బుబోనిక్’ అనే డిసీజ్ కేసు బయటపడిందని ప్రపంచానికి చాటింది. ఇందుకు తాము బాధ్యులం కాకపోయినా.. ఈ ప్లేగు మూలాన్ని తెలిపింది గనుక మళ్ళీ ఆయా దేశాలు దీన్ని వేలెత్తి చూపే అవకాశాలు కనిపిస్తున్నాయి. మంగోలియాలోని ‘బయన్నర్’ అనే సిటీలో ‘ప్లేగ్ ప్రివెన్షన్ అండ్ కంట్రోల్ విభాగం ఈ వ్యాధి కేసుకు సంబంధించి అప్పుడే మూడో హెచ్చరిక జారీ చేసిందని చైనాలోని’ పీపుల్స్ డైలీ ఆన్ లైన్’ వెల్లడించింది. బయన్నర్ లోని ఓ ఆసుపత్రి వర్గాలు ఈ వ్యాధి తాలూకు కేసును ప్రకటించాయని, ఈ సంవత్సరాంతం వరకు ఈ వ్యాధికి సంబంధించి తామిస్తున్న వార్నింగ్ ‘చెల్లుబాటు’ అయ్యే ఉంటుందని ఈ విభాగం స్పష్టం చేసిందని ఈ ‘డైలీ’ పేర్కొంది. ఈ సిటీలో ఈ ప్లేగు విస్తరిస్తోంది. అందువల్ల ప్రజలు స్వీయ రక్షణ పాటించాలి.. ఎవరైనా అనారోగ్యానికి గురయితే తక్షణమే ఆరోగ్య శాఖ అధికారులకు రిపోర్టు చేయాలి అని ఆ విభాగం అధికారులు కోరారట.

మొదట పశ్చిమ మంగోలియాలోని ఖోడ్ ప్రావిన్స్ లో రెండు అనుమానిత బుబోనిక్ ప్లేగు కేసులు బయటపడ్డాయి. ల్యాబ్ టెస్టుల్లో ఇది నిర్ధారణ అయింది. 27 ఏళ్ళ ఓ వ్యక్తికి, 17 ఏళ్ళ అతని సోదరునికి ఈ వ్యాధి సోకడంతో వేర్వేరు ఆస్పత్రుల్లో చికిత్స చేస్తున్నారు. వీరిద్దరూ అడవి కుందేళ్ళ మాంసాన్ని తిన్నారని అందువల్ల ప్రజలు కూడా ఈ మాంసాన్ని తినరాదని అధికారులు హెచ్చరించారు. ఈ అన్నదమ్ములతో కాంటాక్ట్ లో ఉన్న సుమారు 146 మందిని ఐసొలేట్ చేసి వారికి ఆస్పత్రుల్లో చికిత్స అందిస్తున్నారు.

అసలు బుబోనిక్ ప్లేగు అంటే ? అడవి కుందేళ్ళశరీరంలో ఉండే రెక్కల్లేని పురుగుల కారణంగా వ్యాప్తి చెందే బ్యాక్టీరియల్ డిసీజ్ అంటున్నారు. సకాలంలో చికిత్స లభించకుంటే 24 గంటల్లోగా సదరు రోగి మరణిస్తాడట. గత ఏడాది మంగోలియాలో అడవి కుందేళ్ళ మాంసాన్ని తిన్న ఓ జంట మృతి చెందింది. పందుల్లో ఇన్ ఫ్లుయేంజా వైరస్ వల్ల వ్యాప్తి చెందే వ్యాధి గురించి చైనా రీసర్చర్లు పరిశోధిస్తుండగా ఈ బుబోనిక్ ప్లేగు వ్యవహారం కూడా బయటపడింది.