ట్రయల్స్ లో విఫలం.. ఆ మందు మంచిది కాదా ?

చైనా, అమెరికా వంటి దేశాల్లో కరోనా రోగుల చికిత్సలో వాడుతున్న ‘రెమ్ డెసివిర్’ మందు క్లినికల్ ట్రయల్స్ లో విఫలమైందట. దీని ఫలితాలు చూసి రీసెర్చర్లు షాక్ తిన్నారు. ప్రపంచ ఆరోగ్య సంస్థ తన వెబ్ సైట్ లో దీనికి సంబంధించి ఓ ముసాయిదా సమ్మరీని పబ్లిష్ చేసింది.  ఫైనాన్షియల్ టైమ్స్, స్టేట్..  ఈ రెండూ మొట్టమొదట ఈ షాకింగ్ అంశాన్ని రిపోర్ట్ చేశాయి. ఈ మందును ఉత్పత్తి చేస్తున్న ‘గిలీడ్ సైన్సెస్’ సంస్థ మాత్రం ఈ ఫలితాలను కొట్టిపారేసింది. ఈ డేటా ఏదో ప్రయోజనాన్ని ఆశించి సేకరించిందే అయి ఉంటుందని ఈ కంపెనీ ప్రతినిధి ఒకరు వ్యాఖ్యానించారు.  చైనాలో ఈ మెడిసిన్ ని 237 మంది రోగులపై పరీక్షించారు. అయితే సైడ్ ఎఫెక్ట్స్ కారణంగా 18 మంది రోగులకు ఇవ్వడం నిలిపివేశారు. నెల రోజుల అనంతరం కంట్రోల్ గ్రూప్ లోని 12. 8 శాతం రోగులతో పోలిస్తే.. ఈ మందును తీసుకున్న రోగుల్లో 13. 9 శాతం మంది మృతి చెందారు. ఏమైనా.. ప్రపంచ ఆరోగ్య సంస్థ వెబ్ సైట్ లో వఛ్చిన డేటా  అర్థవంతంగా లేదని, ఈ స్టడీ అసంపూర్తిగా ఉందని గిలీడ్ సైన్సెస్ ప్రతినిధి పేర్కొన్నారు. అమెరికా అధ్యక్షుడు ట్రంప్ కూడా ఈ మెడిసిన్ బదులు తమ దేశంలోని  కరోనా రోగుల కోసం హైడ్రాక్సీక్లోరోక్విన్ మందునే కావాలని డిమాండ్ చేసిన సంగతి తెలిసిందే. ఈ మెడిసిన్ కోసం పట్టుబట్టి ఆయన ఇండియా నుంచి తెప్పించుకున్నారు.