మావోల మృతదేహాలను భద్రపరచండి… హైకోర్టు ఆదేశం
చర్ల ఎన్‌కౌంటర్‌పై కొనసాగుతున్న వివాదం కీలక దశకు చేరుకుంది. రీపోస్టుమార్టం నిర్వహించాల్సిందిగా హైకోర్టు ఆదేశాలు జారి చేసింది. అంతవరకు మూడు మృతదేహాలను కొత్తగూడెం ప్రభుత్వ ఆసుపత్రిలో ఫ్రీజ్ చేయాలని నిర్దేశించింది.
చర్ల ఎన్‌కౌంటర్‌లో మరణించిన ముగ్గురు మావోయిస్టు తీవ్రవాదుల మృతదేహాలను భద్రాద్రి-కొత్తగూడెం ప్రభుత్వ ఆసుపత్రిలో భద్రపరచాలని హైదరాబాద్ హైకోర్టు తెలంగాణ ప్రభుత్వాన్ని ఆదేశించింది. ఎంజీఎం ఫోరెన్సిక్ నిపుణులతో రీపోస్టుమార్టం చేయించాలని కూడా హైకోర్టు ఆదేశాలు ఇచ్చింది. పోస్ట్ మార్టం మొత్తం వీడియోగ్రఫీ చేయించి రిపోర్ట్ హైకోర్టుకు సమర్పించాలని తెలిపింది. తదుపరి విచారణ అక్టోబర్ 5వ తేదీకి వాయిదా వేసింది హైదరాబాద్ హైకోర్టు.
చర్ల ఎన్‌కౌంటర్‌లో మరణించిన ముగ్గురు మావోయిస్టు నక్సల్స్ మృతదేహాలకు పోస్ట్ మార్టం నిర్వహించాలంటూ న్యాయవాది రఘునాథ్ దాఖలు చేసిన పిటిషన్‌ను హైకోర్టు గురువారం విచారించింది. పోలీసులపై 302 సెక్షన్ ప్రకారం కేసు నమోదు చేయాలని పిటిషనర్ హైకోర్టును కోరారు. అంతవరకు మృతదేహాలను భద్రపరచాలని ఆయన కోర్టుకు విజ్ఞప్తి చేశారు.
అయితే పోస్టుమార్టం నిర్వహించిన అనంతరం మూడు మృతదేహాలను వారి కుటుంబ సభ్యులకు అప్పగించామని ప్రభుత్వం కోర్టుకు విన్నవించింది. ఈ నేపథ్యంలో వారి మృతదేహాలను తిరిగి తెప్పించి, భద్రాద్రి-కొత్తగూడెం ప్రభుత్వ ఆసుపత్రిలో ఫ్రీజ్ చేయాలని హైకోర్టు ఆదేశాలు జారీ చేసింది.
