పార్టీ పగ్గాలకు నేను దూరం, ప్రియాంక గాంధీ

సమీప భవిష్యత్తులో తాను పార్టీ అధ్యక్ష బాధ్యతలు చేపట్టే ప్రసక్తే లేదని కాంగ్రెస్ పార్టీ ప్రధాన కార్యదర్శి ప్రియాంక గాంధీ స్పష్టం చేశారు. నా నేత నా సోదరుడు రాహుల్ గాంధీయే అని చెప్పారు. పార్టీ పగ్గాలు చేపట్టాలని చాలామంది కోరుతున్నారని, కానీ తనకు ఆ ఆలోచనే లేదని ఆమె పేర్కొన్నారు. మొదట ఉత్తరప్రదేశ్ లోపార్టీని పటిష్టపరచవలసి ఉందని, క్షేత్ర స్థాయి నుంచి పూర్తిగా పునర్వ్యవస్థీకరించవలసి ఉందని ప్రియాంక గాంధీ అన్నారు. గాంధీ కుటుంబం నుంచి కాకుండా మరెవరు పార్టీ అధ్యక్షుడైనా తను మద్దతునిస్తానని వెల్లడించారు.

పార్టీ ప్రెసిడెంట్ గా మన కుటుంబంలో ఎవరూ ఉండరాదని ఆ మధ్య రాహుల్ అన్నారు. ఆయన అభిప్రాయంతో ఏకీభవిస్తున్నాను అని ప్రియాంక గాంధీ తెలిపారు. రాహుల్ తిరిగి అధ్యక్షుడవుతారా అన్న ప్రశ్నకు ఆమె సమాధానాన్ని దాటవేశారు. ప్రధాని మోదీని రాహుల్ ఎదుర్కొన్నంతగా మరెవరూ ఎదుర్కోలేకపోయారని ప్రియాంక గాంధీ పేర్కొన్నారు.