మోదీ రాజీనామా: ఆమోదించిన రాష్ట్రపతి

ఢిల్లీ: ప్రధాని నరేంద్ర మోదీ తన పదవికి రాజీనామా చేశారు. రాష్ట్రపతి రామ్‌నాథ్‌ కోవింద్‌ను కలిసి రాజీనామా పత్రాన్ని సమర్పించగా.. దాన్ని ఆయన ఆమోదించారు. కొత్త ప్రభుత్వం ఏర్పడే వరకు ప్రధానిగా కొనసాగాలంటూ మోదీని రాష్ట్రపతి కోరారు. మంత్రి మండలిని రద్దుచేయాలని ఈ సాయంత్రం జరిగిన కేంద్ర కేబినెట్ భేటీలో నిర్ణయం తీసుకున్నారు.

మరోవైపు, సార్వత్రిక ఎన్నికల ఫలితాలు వెల్లడైన నేపథ్యంలో శుక్రవారం కేంద్ర కేబినెట్‌ సమావేశమై 16వ లోక్‌సభ రద్దుకు తీర్మానం చేసింది. ప్రధానమంత్రి నరేంద్ర మోదీ నేతృత్వంలో జరిగిన సమావేశంలో ఈ నిర్ణయం తీసుకున్నారు. ప్రధాని రాజీనామాతో 17వ లోక్‌సభ ఏర్పాటు కోసం ప్రక్రియ ప్రారంభం కానుంది. కేంద్ర ఎన్నికల సంఘం కొత్త లోక్‌సభ కోసం అధికారిక నోటిఫికేషన్‌ విడుదల చేస్తుంది. నరేంద్ర మోదీ ఆధ్వర్యంలో కొత్త ప్రభుత్వం మే 30న కొలువుదీరనుందని ప్రచారం జరుగుతున్న విషయం తెలిసిందే. ఎన్డీఏ పక్షాలన్నీ మే 25న సమావేశం కానున్నాయి. మోదీని తమ నాయకుడిగా ఆ కూటమి అధికారికంగా ఎన్నుకోనుంది.