రాజధానిలో ర్యాలీల రగడ..రాజాసింగ్ నెక్స్ట్ స్టెప్ ఇదే!

తెలంగాణ రాజధాని హైదరాబాద్ నగరంలో ర్యాలీలపై రాజకీయ రగడ చెలరేగుతోంది. డిసెంబర్ 28న ర్యాలీలు, సభలు నిర్వహించుకుంటామని ప్రధాన రాజకీయ పార్టీలైన బీజేపీ, కాంగ్రెస్ పోలీసుల అనుమతి కోరాయి. అయితే, శాంతి భద్రతలు, ప్రజా రవాణా సమస్యలను సాకుగా చూపిన నగర పోలీసులు రెండు పార్టీల అభ్యర్థనలను తిరస్కరించారు. ఇది కాస్తా రాజకీయ రగడకు తెరలేపింది.

టీఆర్ఎస్ పార్టీకి మిత్రపక్షంగా వున్న ఎంఐఎం పార్టీ ఎక్కడ సభ పెట్టుకోవాలన్నా కూడా విపరీతమైన రద్దీలో కూడా అనుమతిస్తున్న నగర పోలీసులు.. కేంద్రంలో అధికారంలో వున్న బీజేపీకి, కేంద్ర,రాష్ట్రాలలో ప్రతిపక్షంగా వున్న కాంగ్రెస్ పార్టీలకు మాత్రం అనుమతివ్వడం లేదన్న ఆరోపణలు వినిపిస్తున్నాయి. నాలుగు రోజుల క్రితం హైదరాబాద్‌లో భారీ సభను నిర్వహించిన ఎంఐఎం పార్టీ.. శుక్రవారం నిజామాబాద్‌లో కూడా భారీ సభను పూర్తి చేసింది.

నిజానికి దేశవ్యాప్తంగా రగులుతున్న ఎన్నార్సీ, సీఏఏ అంశాలపై సేవ్ కాన్స్టిట్యూషన్ పేరిట నగరంలో బహిరంగ సభకు తెలంగాణ కాంగ్రెస్ ప్లాన్ చేసింది. అందుకు పోలీసుల అనుమతి కోరారు టీపీసీసీ అధ్యక్షుడు ఉత్తమ్ కుమార్ రెడ్డి. అదే సమయంలో లోయర్ ట్యాంక్ బండ్ దగ్గరి ఎన్టీఆర్ స్టేడియంలో సీఏఏ అనుకూల సభకు అనుమతి కోరారు బీజేపీ ఏకైక ఎమ్మెల్యే రాజాసింగ్. పోటాపోటీగా సభలను నిర్వహించేందుకు సిద్దమైన బీజేపీ, కాంగ్రెస్ పార్టీల నేతలకు షాకిచ్చారు తెలంగాణ పోలీసులు. ఇద్దరి అభ్యర్థనలను తోసిపుచ్చారు. పర్మిషన్ తిరస్కరించారు.

పోలీసుల నిర్ణయంతో అటు రాజాసింగ్, ఇటు ఉత్తమ్ కుమార్ రెడ్డి భగ్గుమన్నారు. రేపు కాకపోతే డిసెంబర్ 30న ఇందిరాపార్క్ వద్ద సీఏఏ అనుకూల సభ నిర్వహిస్తామని ప్రకటించారు రాజాసింగ్. పోలీసులు అనుమతించకపోయినా సభను నిర్వహించి తీరతామన్నారు. కేంద్ర ప్రభుత్వ చర్యను సమర్థిస్తూ సభ నిర్వహిస్తే దాన్ని పోలీసులు అడ్డుకోవడమేంటని ప్రశ్నించారాయన.

మరోవైపు టీపీసీసీ అధ్యక్షుడు ఉత్తమ్ కుమార్ రెడ్డి కూడా తెలంగాణ పోలీసుల వైఖరిపై మండిపడ్డారు. ఆర్.ఎస్.ఎస్.కు భారీ ర్యాలీకి అనుమతించిన పోలీసులు.. తమకెందుకు అనుమతినివ్వరిన ప్రశ్నించారాయన. పోలీసులతో పాటు ఆర్.ఎస్.ఎస్. పై కూడా నిప్పులు చెరిగారు ఉత్తమ్. ఆర్.ఎస్.ఎస్. కార్యకర్తలు కర్రలతో నగరంలో భయోత్పాతాన్ని సృష్టించారని ఆరోపించారు. ఏదో ఓ మూలన అనుమతించినా సేవ్ కాన్స్టిట్యూషన్ పేరిట సభ నిర్వహించుకుంటామని కోరారు. సేవ్ కాన్స్టిట్యూషన్ ర్యాలీకి పోలీసులు అనుమతి తిరస్కరించడంతో టీపీసీసీ వర్కింగ్ ప్రెసిడెంట్ మల్లు భట్టి విక్రమార్క పేరు మార్చేశారు. తిరంగా ర్యాలీని అనుమతివ్వాలని కోరుతూ మరో అప్లికేషన్ పెట్టారు భట్టి. సో.. హైదరాబాద్ ర్యాలీలు.. వాటి చుట్టూ రాజకీయ రగడతో మార్మోగిపోతోంది.