కరోనా బాధితుల కోసం..మరో రాష్ట్రంలో ప్లాస్మా బ్యాంక్

ఓ వైపు దేశవ్యాప్తంగా కరోనా వైరస్ విజృంభిస్తుండగా..మరోవైపు రికవరీ రేటు కూడా భారీగా నమోదుకావడం హర్షించదగ్గదిగా చెబుతున్నారు నిపుణులు. మరోవైపు కరోనా పేషెంట్లకు అందిస్తున్న ప్లాస్మా థెరఫీ చికిత్స విధానం కూడా సత్ఫలితాలను ఇస్తుండటంతో ఇప్పుడు దేశవ్యాప్తంగా ప్లాస్మా బ్యాంకులు అందుబాటులోకి వస్తున్నాయి. తొలుత దేశరాజధాని ఢిల్లీలో ముఖ్యమంత్రి కేజ్రీవాల్ ప్లాస్మా బ్యాంక్‌ను ఏర్పాటు చేశారు. ఆ తర్వాత తమిళనాడులోనూ భారీ ఎత్తున ప్లాస్మా బ్యాంక్ ఏర్పాటు చేసింది. అక్కడి ప్రభుత్వం. ఇప్పుడు తాజాగా మరో రాష్ట్రంలోనూ ప్లాస్మా బ్యాంక్ ఏర్పాటు చేయనున్నట్లు అక్కడి ప్రభుత్వం ప్రకటించింది.

రాజస్థాన్ రాష్ట్రంలోని జైపూర్‌లో ప్లాస్మా బ్యాంకు ఏర్పాటు చేయనున్నట్లు ఆ రాష్ట్ర ఆరోగ్యశాఖ మంత్రి రఘుశర్మ వెల్లడించారు. కరోనా రోగులకు చికిత్స చేసేందుకు వీలుగా కొత్తగా మొట్టమొదటి సారి జైపూర్ నగరంలోని సవాయ్ మాన్ సింగ్ ఆసుపత్రిలో ఈ ప్లాస్మా బ్యాంకు ప్రారంభించనున్నట్లు మంత్రి స్పష్టం చేశారు. కరోనావైరస్ బారి నుంచి కోలుకొని డిశ్జార్జ్ అయిన వారు ముందుకు వచ్చి ప్లాస్మాను దానం చేయాలని మంత్రి కోరారు. కరోనా రోగుల ప్రాణాలను కాపాడేందుకు కరోనా నుంచి కోలుకున్న వారు ముందుకు రావాలని మంత్రి పిలుపునిచ్చారు.

ఇకపోతే, రాజస్థాన్ రాష్ట్రంలో 33,220 కరోనా కేసులు నమోదు కాగా, వీరిలో 594 మంది వైరస్ బారిన పడి మరణించినట్లు అక్కడి వైద్యాధికారులు వెల్లడించారు.