హైదరాబాద్ వాసుల్లో తీవ్రస్థాయిలో విటమిన్ లోపం

హైదరాబాద్ వాసుల్లో విటమిన్ల లోపం ఎక్కువగా ఉందట. సమతుల ఆహారం సరిగా తీసుకోకపోవడం వల్ల విటమిన్ ఎ, విటమిన్ డి, బీ1, బీ2, బీ6, బీ12, ఫోలెట్ విటమిన్ల లోపంతో బాధపడుతున్నారని నేషనల్ ఇన్‌స్టిట్యూట్ ఆఫ్ న్యూట్రిషియన్ (ఎన్ఐఎన్) తెలిపింది. న్యూట్రిషియన్ అనే జర్నల్‌లో ఈ అధ్యయనాన్ని ప్రచురించారు.

హైదరాబాద్, సికింద్రాబాద్‌లలో నివసిస్తోన్న ప్రజలపై ఎన్ఐఎన్ ఈ పరిశోధన చేసింది. 50 శాతం మందిలో విటమిన్ బి2 లోపం ఉండగా.. 46 శాతం మంది బీ6 లోపంతో బాధపడుతున్నారు. 46 శాతం మంది విటమిన్ బీ12, 32 శాతం మంది ఫోలెట్, 29 శాతం మంది విటమిన్ డి లోపంతో బాధపడుతున్నారు. రక్తంలో హోమోసిస్టెయిన్ స్థాయిలు ఎక్కువగా ఉన్నట్టు గుర్తించారు. ముఖ్యంగా పురుషుల్లో హోమోసిస్టెయిన్ స్థాయిలు ఎక్కువగా ఉన్నాయి. దీని వల్ల గుండె జబ్బులు వచ్చే ఆస్కారం ఎక్కువగా ఉన్నట్లు ఎన్ఐఎన్ తెలిపింది. కొద్దిపాటి విటమిన్ల లోపం కూడా తీవ్ర పరిణామాలకు దారి తీసే అవకాశం ఉందని పరిశోధకులు హెచ్చరిస్తున్నారు.