మంచి ఘనురాలే.. ఉక్కపోతగా ఉందని విమానం కిటికీ తెరిచిందట

విమానం ఎక్కడం కొత్తనో..? లేక సెన్సేషనల్‌గా మారాలనుకుందో..? తెలీదు గానీ తన చర్యతో విమాన సిబ్బందిని ముక్కున వేలేసుకునేలా చేసింది ఓ మహిళ. ఉక్కపోతగా ఉందని విమానం కిటీకిని తెరిచి పెట్టుకుంది ఆ మహిళ. దీంతో విమానం స్టార్ట్ అవ్వకపోగా.. అందులో ఉన్న ప్రయాణికులు గంట సమయం వృథా అయ్యింది. ఈ ఘటన చైనాలో చోటు చేసుకుంది.

వివరాల్లోకి వెళ్తే.. చైనాలోని గాన్సు నుంచి హుబే ప్రావిన్సులోని వుహాన్‌కు వెళ్లాల్సిన షియామెన్‌ ఎయిర్‌ జెట్‌ టేకాఫ్‌ కావడానికి సిద్ధంగా ఉంది. ఈలోపు విమానంలో కూర్చున్న ఓ మహిళ ఎమర్జెన్సీ ఎగ్జిట్‌ కిటీకిని తెరిచింది. దీంతో విమానం స్టార్ట్‌ కాలేదు. కారణం ఏమై ఉంటుందా..? అని ఆలోచించిన సిబ్బందికి కిటికీ తెరిచి ఉండటం కంటబడింది. దీన్ని గమనించి వెంటనే ఆమె వద్దకు వెళ్లి అడగ్గా ఉక్కపోతగా ఉందని, గాలికోసం కిటికీని తెరిచానని చెప్పింది. ఈ సమాధానంతో అక్కడున్న అందరూ అవాక్కయ్యారు. ఈ ఘటనపై వెంటనే అక్కడే ఉన్న పోలీసులకు సమాచారమివ్వగా విమానంలో తనిఖీలు చేశారు. దీంతో గంట ఆలస్యంగా విమానం బయలుదేరింది. ఇక ఈ తతంగాన్నంతా అక్కడే ఉన్న ఓ వ్యక్తి వీడియో తీసి సోషల్‌ మీడియాలో పెట్టాడు. ఇక ఈ వీడియో ఇప్పుడు సోషల్ మీడియాలో విపరీతంగా వైరల్‌ అవుతోంది.