అమలాపురంలో రూపాయికే చీర.. చివరికి యజమాని కొంపకొల్లేరు..!

సేల్స్ పెరగడానికి, షాపును ప్రమోట్ చేసుకోవడం కోసం ఈ మధ్యకాలంలో వ్యాపారస్తులు చిత్ర విచిత్రమైన ఆఫర్లు ప్రకటిస్తున్నారు. కొన్నిసార్లు అవి లాభాలను తెచ్చిపెడుతుంటే.. మరి కొన్నిసార్లు నష్టాలు కొని తెస్తున్నాయి. ఇక తాజాగా ఇలాంటి ఘటన ఒకటి తూర్పుగోదావరి జిల్లా అమలాపురంలో జరిగింది. వ్యాపారం లబ్ది కోసం ఆ యజమాని ఆఫర్‌ను ప్రకటిస్తే.. అది అతడికి కొత్త తలనొప్పులను తెచ్చి పెట్టింది.

న్యూ ఇయర్ రోజున.. తన షాప్ బాగా ప్రమోట్ అవుతున్న ఉద్దేశంతో అమలాపురానికి చెందిన ఓ వస్త్ర వ్యాపారి.. రూపాయికే చీర ఆఫర్‌ను ప్రకటించాడు. మహిళలకు ఇంతకన్నా ఏం కావాలి.. ఒక్కసారి ఈ ఆఫర్ గురించి విన్నారో లేదో ఆ షాపు ముంగిట బారులు తీరారు. అంతేకాకుండా గుంపులు గుంపులుగా షాపులోకి ఎగబడి.. దొరికిన చీరను పట్టుకుని వెళ్లిపోయారు. ఈ హఠాత్పరిణామానికి ఒక్కసారిగా షాక్ తిన్న షాపు యజమాని చేసేదేమీ లేక పోలీసులను ఆశ్రయించారు. చూశారా ప్రచారం కోసం ఆఫర్‌ను ప్రకటిస్తే.. మొదటికే మోసం వచ్చి పడింది.