ఐపీఎల్కు కరోనా బీమా వర్తించదట..!
ప్రపంచ క్రీడా రంగం కుదేలైన నేపథ్యంలో..ఐపీఎల్కు కొవిడ్ బీమా కల్పించాలని పాలక మండలి, బీసీసీఐ, ఫ్రాంచైజీలు, ప్రసారకర్త స్టార్ ఇండియా భావించాయి
కరోనా దెబ్బకు ప్రపంచ వ్యాప్తంగా క్రీడా రంగం మొత్తం కుదేలైంది. మహమ్మరి ఉగ్రరూపానికి క్రికెట్, టెన్నిస్, ఫుట్బాల్, హాకీ, బ్యాడ్మింటన్, రగ్బీ తదితర క్రీడలు ఎక్కడికక్కడే నిలిచి పోయాయి. క్రీడాకారులకు కనీసం ప్రాక్టీస్ చేసే పరిస్థితి కూడా లేకుండా పోయింది. మార్చిలో ప్రారంభమైన ఈ పరిస్థితి ఆగస్టుకు వచ్చే సరికి కాస్త తగ్గిందనే చెప్పాలి. ప్రపంచాన్ని వణికించిన కరోనా ఇప్పుడిప్పుడే తగ్గు ముఖం పడుతోంది. నిలిచి పోయిన క్రీడలు ఇప్పుడిప్పుడే గాడిలో పడుతున్నాయి. క్రికెట్, ఫుట్బాల్, టెన్నిస్, ఫార్మూలావన్ తదితర క్రీడలు తిరిగి ప్రారభమవుతున్నాయి. దాదాపు నాలుగు నెలల సుదీర్ఘ విరామం తర్వాత ఇంగ్లండ్వెస్టిండీస్ సిరీస్తో అంతర్జాతీయ క్రికెట్ మళ్ల ప్రారంభమైంది. ఇక యుఎఇ వేదికగా సెప్టెంబర్ 19 నుంచి ఇండియన్ ప్రీమియర్ లీగ్ ట్వంటీ20 టోర్నమెంట్ జరుగనుంది. దీని కోసం ఇప్పటికే ఆయా జట్ల క్రికెటర్లు యుఎఇ చేరుకున్నారు. దీంతో దేశంలో క్రికెట్ సందడి ప్రారంభమైంది.
ప్రపంచ క్రీడా రంగం కుదేలైన నేపథ్యంలో..ఐపీఎల్కు కొవిడ్ బీమా కల్పించాలని పాలక మండలి, బీసీసీఐ, ఫ్రాంచైజీలు, ప్రసారకర్త స్టార్ ఇండియా భావించాయి. కానీ, ప్రస్తుత తరుణంలో ఐపీఎల్కు బీమా సౌకర్యం కల్పించడం సాధ్యం కాదని భీమా కంపెనీలు స్పష్టం చేశాయి. ప్రపంచ క్రీడా రంగంలో ‘వైరస్’ తరహా బీమాను వింబుల్డన్ నిర్వాహకులు మాత్రమే చేయించారు. అదికూడా 2003లో సార్స్ ప్రబలినప్పటినుంచి ఆల్ ఇంగ్లండ్ క్లబ్ నిర్వాహకులు ఏటా ఈ తరహా పాలసీ తీసుకుంటున్నారు. కాగా, కొవిడ్తో 2020 వింబుల్డన్ రద్దుకాగా..నిర్వాహకులకు రూ. 1042 కోట్లు బీమాగా లభించింది. అయితే, దుబాయ్ వేదికగా జరుగుతున్న ఐపీఎల్కు సైతం బీసీసీఐ, ఫ్రాంచైజీలు రెండు పెద్ద బీమా పాలసీలు తీసుకున్నాయి. టోర్నీ రద్దుకు సంబంధించి బీసీసీఐ చేసిన బీమా మొదటిది. రెండో దానిని ఆటగాళ్లు రెమ్యునరేషన్ నష్టపోతే చెల్లించే పాలసీని ఫ్రాంచైజీలు తీసుకున్నాయి. అయితే, ఈ రెండు పాలసీలు కొవిడ్ కిందకు రావని ప్రముఖ బీమా సంస్థ ఒకటి తేల్చి చెప్పింది. కరోనా ఇప్పటికీ కొనసాగుతున్నందున ప్రపంచ వ్యాప్తంగా ఆ వైర్సకు సంబంధించి క్రీడా బీమా పాలసీలే లేవని వెల్లడించింది. దీంతో ఖంగుతిన్న బీసీసీఐ, ఫ్రాంచైజీలు తలలుపట్టుకుంటున్నాయి. ఇతర క్రీడాలకు కల్పించిన భీమా క్రికెట్ కు కూడా వర్తింపజేయాలని కోరుతున్నారు.