జామ తింటే ‘నిఫా’ వస్తుందా..?

కేరళలో మరోసారి నిఫా వైరస్ విజృంభించింది. ఈ వ్యాధి లక్షణాలున్న పలువురు కేరళలోని ఆసుపత్రిల్లో వైద్యుల ప్రత్యేక పర్యవేక్షణలో చికిత్స తీసుకుంటున్నారు. కాగా ఈ ఏడాది మొదట ఓ 23ఏళ్ల స్టూడెంట్‌కు ఈ వ్యాధి లక్షణాలను గుర్తించిన డాక్టర్లు.. తరువాత పరీక్షల ద్వారా అతడికి నిఫా సోకినట్లు నిర్ధారించారు. దీంతో ఈ సంవత్సరం మొదటి నిఫా కేసు అతడి పేరు మీదే నమోదైంది. కాగా డాక్టర్ల వైద్యంతో ఆ విద్యార్థి ప్రస్తుతం కోలుకుంటున్నాడు. ఇదిలా ఉంటే ఈ వ్యాధిపై కేంద్రం నియమించిన ఆరుగురు సభ్యుల కమిటీ.. అసలు ఆ విద్యార్థికి నిఫా ఎలా సోకిందంటూ ఆరాలు తీశారు.

ఈ క్రమంలో ఆ విద్యార్థిని ప్రశ్నించగా.. వైరస్ తనకు సోకక రెండు వారాల ముందు తాను కుళ్లిన జామకాయను తిన్నానని పేర్కొన్నాడు. అయితే జామ కాయలు తింటే నిఫా రాదని.. దానిని గబ్బిలం కొరికి ఉండొచ్చని.. స్టూడెంట్‌కు నిఫా వైరస్ సోకడానికి అదే కారణం అయ్యిండచ్చొని అధికారులు భావిస్తున్నారు. ఈ మేరకు గబ్బిలం రక్త నమూనాను తీసుకున్న వారు పరీక్షల నిమిత్తం లేబోరేటరీకి పంపారు. ఇదిలా ఉంటే నిఫా వైరస్ లక్షణాలతో ఇటీవల కలామస్సరీ మెడికల్ కాలేజీ ఆసుపత్రిలో చేరిన ఐదు మందిలో ఇద్దరు బుధవారం డిశ్చార్జ్ అయ్యారు. మిగిలిన ముగ్గురి పరిస్థితి నిలకడగానే ఉన్నట్లు తెలుస్తోంది.

ఇది జంతువుల ద్వారా వ్యాపించే వైరస్. కలుషిత ఆహారం మనుషుల ద్వారా ఒకరి నుంచి మరొకరికి వ్యాపించే అవకాశము ఉంది.