Karnataka: సినిమా చూసి నిజమని నమ్మాడు.. ఊరు చివరకు వెళ్లి పెట్రోల్ పోసుకుని నిప్పంటించుకున్నాడు.. చివరకు..!

Karnataka: ఆధునిక ప్రపంచంలోనూ మూఢ నమ్మకాలను వదలిపెట్టడంలేదు జనం. మూఢ విశ్వాసాలతో మరింత అంధకారంలోకి కూరుకుపోతున్నారు. తాజాగా ఓ యువకుడు సినిమా చూసి, అలా చేస్తే మోక్షం లభిస్తుందని విశ్వసించాడు. ఇంకేముంది.. ఒంటికి నిప్పంటించుకుని ఆత్మ త్యాగానికి పాల్పడ్డాడు. కర్ణాటకలో జరిగిన ఈ ఘటన తీవ్ర కలకలం రేపుతోంది. ఈ ఘటనకు సంబంధించిన వివరాలు ఇలా ఉన్నాయి. తుమకూరు జిల్లా మధుగిరి సమీపంలోని ఓ గ్రామానికి చెందిన 23ఏళ్ల రేణుకా ప్రసాద్‌ ఇంటర్మీడియట్ పరీక్షల్లో తప్పి ఖాళీగా ఉండేవాడు. ఏదో ఒక పని చూసుకోవాలని తల్లిదండ్రులు చెప్పిన మాటను వినిపించుకోలేదు.

ఈ క్రమంలో ఇంట్లో ఖాళీగా టీవీ చూస్తూ ఉండేవాడు. చాలా ఏళ్ల క్రితం విడుదలైన ఓ తెలుగు సినిమాను 25 సార్లు చూశాడు. తాను ఆత్మహత్య చేసుకుంటే మోక్షం వస్తుందని.. పునర్జన్మ ఉండదని విశ్వసించాడు. ఇదే విషయాన్ని తన స్నేహితులు, గ్రామస్థులతో తెలిపాడు. ఈ క్రమంలోనే తాజాగా గ్రామ శివార్లలోకి వెళ్లి.. పెట్రోలు పోసుకుని ప్రాణత్యాగం చేసి మోక్షం పొందుతున్నానని సెల్‌ఫోన్‌లో సెల్ఫీవీడియో తీసి, తన తండ్రికి పంపించాడు. ఆ వెంటనే ఒంటిపై పెట్రోల్ పోసుకుని నిప్పంటించుకున్నాడు. ఇది గమనించిన స్థానికులు.. బాధితుడ్ని రక్షించి, బెంగళూరులోని విక్టోరియా ఆసుపత్రిలో చేర్పించారు. అయితే, ఆస్పత్రిలో చికిత్స పొందుతూ ప్రాణాలు కోల్పోయాడు రేణుకా ప్రసాద్‌. ఈ ఘటనపై కేసు నమోదు చేసుకున్న పోలీసులు దర్యాప్తు చేపట్టారు.

మరిన్ని జాతీయ వార్తల కోసం ఈ లింక్ క్లిక్ చేయండి..