కేరళ… ఆ మెడికల్ కాలేజీ ఆసుపత్రిలో ఏం జరుగుతోంది ?

తిరువనంతపురంలోని మెడికల్ కాలేజీ ఆసుపత్రిలో ‘విచిత్రాలు’ జరుగుతున్నాయి. ఆత్మహత్యలు, ఆసుపత్రి నుంచి పరారీలు, ప్రోటోకాల్ ఉల్లంఘనలు, కరోనా టెస్టింగుల్లో జాప్యం, నిర్లక్ష్యం.. ఇలా ఒకదాని వెనుక ఒకటి జరుగుతున్నా.. ఇదేమిటని అడిగే నాథుడే లేకుండా పోయాడు. ఉదాహరణకు నిన్నటికి నిన్న.. 33 ఏళ్ళ ఉన్ని అనే పెయింటర్, 38 ఏళ్ళ మురుగన్ అనే కార్పెంటర్ ఆత్మహత్యలకు పాల్పడ్డారు. వీరిద్దరూ మద్యానికి అలవాటు పడ్డారని, కరోనా పాజిటివ్ లక్షణాలు తగ్గినట్టు కనిపించారని ఈ మెడికల్ కాలేజీ వర్గాలు తెలిపాయి. ఈ నెల 9 న ఉన్ని తన ఐసోలేషన్ రూమ్ నుంచి  తప్పించుకుని తన గ్రామానికి పారిపోయాడని, అయితే కొంతమంది ఇఛ్చిన సమాచారంతో పోలీసులు అతడి గ్రామానికి వెళ్లి అతడ్ని మళ్ళీ ఆసుపత్రికి తీసుకువచ్చారని తెలిసింది. కానీ మరుసటి రోజునే ఉన్ని తన రూమ్ లో ఫ్యాన్ కి ఉరి వేసుకుని సూసైడ్ చేసుకున్నాడు. ఇక మురుగన్ కూడా మద్యం మత్తులో రోడ్డుపై పడి ఉండగా స్థానికులు తెలిపిన సమాచారంతో పోలీసులు అతడిని ఈ హాస్పిటల్ కి తీసుకువచ్చారు.  కానీ ఏ కారణంవల్లో అతడు కూడా ఆత్మహత్యకు పాల్పడ్డాడు. మరో ఘటనలో వర్గీస్ అనే వ్యక్తి ఈ నెల 2 న మరణించాడు. అతనికి కనీసం పదిహేను రోజుల క్రితమే కరోనా లక్షణాలు కనిపించాయి. కానీ సరిగా టెస్టులేవీ చేయకపోవడంతో రెండో తేదీన మృతి చెందాడు. ఇలాగే విదేశాల నుంచి వఛ్చిన ఇద్దరికి కూడా  కరోనా పరీక్షలు జరపలేదని తెలియవచ్చింది.

ఓవైపు కరోనా వైరస్ కేసుల విషయంలో కేరళ రాష్ట్రం దేశంలోనే అత్యంత జాగ్రత్తగా వ్యవహరిస్తోందని, కరోనా మరణాలను నియంత్రించగలుగుతోందని వార్తలు వస్తుండగా.. ఈ మెడికల్ కాలేజీ వ్యవహారం మాత్రం ఇందుకు పూర్తి విరుధ్ధంగా ఉండడం ఆశ్చర్యం కలిగిస్తోంది.