కరోనా క్రైసిస్.. అంతర్జాతీయ దర్యాప్తులో చేతులు కలిపిన ఇండియా

కరోనా వైరస్ క్రైసిస్, దీన్ని   ప్రపంచ ఆరోగ్య సంస్థ ‘హాండిల్’ చేస్తున్న తీరుపై నిష్పాక్షిక, స్వతంత్ర, సమగ్ర దర్యాప్తునకు 62 దేశాలు సమాయత్తమయ్యాయి. ఆస్ట్రేలియా, యూరోపియన్ యూనియన్ చొరవతో చేపడుతున్న ఈ దర్యాప్తులో చేతులు కలిపేందుకు ఇండియా కూడా అంగీకరించింది. 73 వ వరల్డ్ హెల్త్ అసెంబ్లీ సమావేశం సోమవారం నుంచి జెనీవాలో జరగనుంది. ఈ నేపథ్యంలో ఈ దర్యాప్తునకు సంబంధించిన ముసాయిదా తీర్మానాన్ని రూపొందించారు. ‘ఇంపార్షియల్, ఇండిపెండెంట్, కాంప్రెహెన్సివ్ ప్రోబ్ (ఇన్వెస్టిగేషన్) పేరిట ఈ తీర్మానాన్ని వ్యవహరిస్తున్నారు. ఈ పాండమిక్ అదుపునకు ప్రపంచ ఆరోగ్య సంస్థ ఎలాంటి చర్యలు చేపడుతున్నదీ, చేపట్టాలనుకుంటున్నదీ తదితర అన్ని అంశాలపైనా ఈ దర్యాప్తు సాగుతుందని అంటున్నారు. కరోనా ఔట్ బ్రేక్ పై దర్యాప్తు జరగాలని గత నెలలో ఆస్ట్రేలియా దేశమే మొదటిసారిగా డిమాండ్ చేసింది. ఒక దశలో అమెరికా అధ్యక్షుడు ట్రంప్ కూడా ఇలాగే డిమాండ్ చేసిన విషయం గమనార్హం. కాగా ఈ ముసాయిదా తీర్మానంలో చైనా దేశాన్ని గానీ , వూహాన్ సిటీని గానీ పేర్కొనలేదు. యూరోపియన్ యూనియన్ మద్దతుతో రూపొందించిన ఈ ముసాయిదా తీర్మానంపై జపాన్, బ్రిటన్, న్యూజిలాండ్, సౌత్ కొరియా, బ్రెజిల్, కెనడా దేశాలతో సహా పలు దేశాలు సంతకాలు చేశాయి.