Viral: పార్క్‌లో వాటర్ బాటిల్స్ అమ్ముతున్న యువకుడు.. పోలీసులను చూడగానే హైరానా.. అతని బ్యాగ్ చెక్ చేయగా

Karnataka: ఈజీగా మనీ సంపాదించాలనుకునేవాళ్లు ఇప్పుడు గంజాయి రవాణాకు, అమ్మకాలకు పాల్పడుతున్నారు. ముఖ్యంగా ఏపీలో గంజాయి మూలాలు భయపెడుతున్నాయి. సర్కార్ ఉక్కుపాదం మోపుతున్నప్పటికీ ఏజెన్సీ ప్రాంతాల్లో గుట్టుగా సాగు నడుస్తుందన్న ప్రచారం జరుగుతుంది. దేశవ్యాప్తంగా చాలా ప్రాంతాల్లో పట్టుబడుతున్న గంజాయి లింకులు ఏపీ(Andhra Pradesh)లోనే దొరకుతున్నాయి. ఇక ఈ గంజాయిని రహస్యంగా తరలించేందుకు, అమ్మేందుకు కేటుగాళ్లు పడుతున్న కథలు అన్నీ, ఇన్నీ కాదు. కొత్త.. కొత్త ఐడియాలతో పోలీసులకే ఝలక్ ఇస్తున్నారు. తాజాగా బెంగళూరు(Bengaluru)లో గంజాయి అమ్ముతున్న 18 ఏళ్ల యువకుడిని పోలీసులు అదుపులోకి తీసుకున్నారు. పార్క్‌లో వాటర్ బాటిల్స్ అమ్ముతున్నట్లు యాక్ట్ చేస్తూ.. గుట్టుగా గంజాయి కూడా సేల్ చేస్తున్నాడు. నైరుతి బెంగళూరులోని లగ్గెరెలోని కావేరీ నగర్‌లో నివాసం ఉంటున్న ధనుష్ శనివారం ఆండ్రహళ్లిలోని ‘డి’ గ్రూప్ లేఅవుట్‌లోని పబ్లిక్ పార్క్ దగ్గర గంజాయి అమ్ముతూ ‘రెడ్ హ్యాండెడ్’గా పట్టుబడ్డాడు. అతను చిన్న ప్లాస్టిక్ సాచెట్‌లలో మత్తును ప్యాక్ చేసి అమ్మకాలు జరుపుతున్నాడు. అతని వద్ద నుంచి సుమారు 930 గ్రాముల గంజాయి ఆకులను స్వాధీనం చేసుకున్నట్లు పోలీసులు తెలిపారు.

ధనుష్ తన స్వగ్రామమైన చిత్తూరులో ఓ వ్యక్తి నుంచి రూ.30 వేలకు కిలో గంజాయిని కొనుగోలు చేసినట్లు పోలీసులు తెలిపారు. దాన్ని చిన్న, చిన్న పొట్లాల్లో నింపి.. ఒక్కో ప్యాకెట్‌ను దాదాపు రూ.600కు విక్రయించినట్లు పోలీసులు తెలిపారు.  పక్కా సమాచారం మేరకు బ్యాదరహళ్లి పోలీసుల టీమ్ అతడిని అదుపులోకి తీసుకుంది. అతని నుంచి గంజాయితో పాటు రూ.1,400 నగదును స్వాధీనం చేసుకున్నట్లు పోలీసులు తెలిపారు.  నార్కోటిక్ డ్రగ్స్ అండ్ సైకోట్రోపిక్ సబ్‌స్టాన్సెస్ (ఎన్‌డిపిఎస్) సెక్షన్ 20 బి కింద అతన్ని అరెస్టు చేసినట్లు వెల్లడించారు. (Source)

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..