కమలా హారిస్ పేరు పలకలేని సెనెటర్, ఇక రచ్చే రచ్చ!

అమెరికా అధ్యక్ష ఎన్నికల్లో ఉపాధ్యక్ష పదవికి పోటీ చేస్తున్న కమలా హారిస్ పేరును రిపబ్లికన్ సెనెటర్ఒకరు సరిగా పలకలేక నానా అవస్థా పడ్డాడు. జార్జియాలో జరిగిన ఓ ర్యాలీలో పాల్గొన్న డేవిడ్ పెర్డ్యూ అనే ఈయన.. కమలా హారిస్ పేరును పలకబోయి..’కహ్..మహ్..లా’ అని, ‘ కమలా..మాలా..మాలా ‘ అని రకరకాలుగా వ్యాఖ్యానించాడు. ‘అసలు ఆమె పేరు విషయం నాకేం తెలియదు.. అదేం పేరో’ ? అని కూడా వ్యంగ్యంగా పేర్కొన్నాడు, అంతే ! ఇక కమలా హారిస్ మద్దతుదారులకు అతనిపై చిర్రెత్తుకొచ్చింది. ‘మై నేమ్ ఈజ్ అని’, ‘ఐ స్టాండ్ విత్ యూ’ అని హ్యాష్ ట్యాగ్ లతో ఆన్ లైన్ ప్రచారాన్ని ప్రారంభించారు. కమలా హారిస్ అధికార ప్రతినిధి సబ్రినా సింగ్ ఓ అడుగు ముందుకేసి.. నువ్వు (డేవిడ్ పెర్డ్యూ) మాజీ సెనెటర్ అయితే ఇక ఫ్యూచర్ వైస్ ప్రెసిడెంట్ కమలా హారిస్ అని తప్పనిసరిగా పిలవాల్సిందే అని మొట్టికాయలు వేసింది. జార్జియా నుంచి ఈ ఎంపీగారు మళ్ళీ ఎన్నిక కాగోరుతున్నాడు.