‘ఫొణి’ పోయి.. ‘వాయు’ వచ్చే

లక్షద్వీప్, తూర్పు మధ్య అరేబియా సముద్రాన్ని ఆనుకొని నైరుతి అరేబియా సముద్రం మీదుగా ఏర్పడిన వాయుగుండం తుపానుగా బలపడింది. ఇది రానున్న 24 గంటల్లో తీవ్ర తుపానుగా మారే అవకాశం ఉందని భారత వాతావరణ శాఖ వెల్లడించింది. ఈ తుఫాను ప్రభావంతో కేరళ, లక్షద్వీప్, కర్ణాటక, కొంకణ్, మహారాష్ట్ర, గోవా తదితర ప్రాంతాల్లో నేటి నుంచి భారీ వర్షాలు కురుస్తాయని ఆ శాఖ పేర్కొంది. ఇక ఈ తుపానుకు మనదేశం సూచించిన వాయు అనే పేరును పెట్టారు.

కాగా 13వ తేదికి ఇది తీవ్ర తుపానుగా మారి గుజరాత్ పోర్‌బందర్-మహువా మధ్య తీరం దాటుతుందని వాతావరణ శాఖ అంచనా వేసింది. తీరం దాటే సమయంలో గంటకు 120-135కి.మీ వేగంతో గాలులు వీచే అవకాశం ఉన్నట్లు పేర్కొంది. మత్స్యకారులు వేటకు వెళ్లకపోవడమే మంచిదని అధికారులు హెచ్చరికలు జారీ చేశారు.