చైనాకు ‘మహా’ షాక్..రూ.5 వేల కోట్ల ప్రాజెక్టులు నిలిపివేత

చైనాపై భారత దేశవ్యాప్తంగా తీవ్ర వ్యతిరేకత వ్యక్తమవుతోంది. చైనా ఎలాగైన బుద్ది చెప్పాలనే నినాదంతో యావత్ దేశప్రజలు ఆగ్రహంతో మండిపోతున్నారు. సరిహద్దులో భారత్‌, చైనా మధ్య ఘర్షణ నేపథ్యంలో చైనా వస్తువులను, ఆ దేశ కాంట్రాక్టులను బహిష్కరించాలన్న డిమాండ్‌ వ్యక్తమవుతోంది. ఈ నేపథ్యంలో చైనాకు మహారాష్ట్ర సర్కార్ గట్టి షాక్ ఇచ్చింది. రూ. 5,000 కోట్ల విలువైన మూడు ఒప్పందాలను రద్దు చేసుకున్నట్లు మహారాష్ట్ర ప్రభుత్వం ప్రకటించింది. కేంద్ర ప్రభుత్వంతో సంప్రదించిన తర్వాతే ఈ నిర్ణయం తీసుకున్నట్లు మహారాష్ట్ర పరిశ్రమల శాఖ మంత్రి సుభాష్ దేశాయ్ వెల్లడించారు.

జూన్ 17న ఆన్‌లైన్ ద్వారా జరిగిన ’మ్యాగ్నటిక్‌ మహారాష్ట్ర 2.0’లో భాగంగా దేశంలోని పలు కంపెనీలతోపాటు అమెరికా, సింగపూర్‌, దక్షిణ కొరియా, చైనాకు చెందిన సంస్థలతో మహారాష్ట్ర ప్రభుత్వం 12 ఒప్పందాలు చేసుకున్నది. మూడు చైనా కంపెనీలైన హెంగ్లీ ఇంజనీరింగ్, పిఎమ్‌ఐ ఎలక్ట్రో మొబిలిటీ సొల్యూషన్స్ జెవి విత్ ఫోటాన్, గ్రేట్ వాల్ మోటార్స్‌తో పూణే జిల్లాలోని తలేగావ్‌లో పెట్టుబడులు పెట్టడానికి ఎంవోయూలను కుదుర్చుకుంది మహారాష్ట్ర ప్రభుత్వం.

అయితే, ఇండో-చైనా సరిహద్దు లఢక్‌లోని గల్వాన్‌ లోయలో జూన్‌ 15-16 తేదీల్లో చైనా సైన్యం దాష్టికానికి తెగబడటంతో 20 మంది భారతీయ సైనికులు ప్రాణాలు కోల్పోయిన సంగతి తెలిసిందే. దీంతో ఈ ఘటనపై దేశవ్యాప్త నిరసనలు వ్యక్తమవుతున్నాయి. ఈ క్రమంలోనే మహారాష్ట్ర సీఎం ఉద్ధవ్‌ ఠాక్రే ఈ కీలక నిర్ణయం తీసుకున్నారు. మూడు చైనా కంపెనీలతో కుదుర్చుకున్న రూ. 5,000 కోట్ల విలువైన మూడు ప్రాజెక్టులను నిలిపివేస్తున్నట్లు ప్రకటించారు. ఇప్పటికే చైనా కంపెనీతో కుదుర్చుకున్న రూ.470 కోట్ల సిగ్నల్‌ కాంట్రాక్టును రైల్వే శాఖ రద్దు చేసుకున్న సంగతి తెలిసిందే.